Беларусы за паўгода атрымалі з-за мяжы больш за $500 мільёнаў

За 6 месяцаў 2014 беларусы атрымалі з-за мяжы больш за 511 млн даляраў.

Асабістыя грашовыя пераводы, атрыманыя беларускімі грамадзянамі з-за мяжы ва II квартале 2014 года, склалі $267,8 млн і павялічыліся ў параўнанні са студзенем-сакавіком гэтага года на 10%, паведамляецца ў статыстычнай справаздачы Нацыянальнага банку краіны.

Паводле звестак НББ, з пачатку года асабістыя пераводы грамадзян павялічыліся на 2,8% у параўнанні з тым жа перыядам 2013 да $511,3 млн, піша «Інтэрфакс».

Як сведчыць статыстыка НББ, у II квартале 2014 паступленні ад аплаты працы склалі $157,6 млн і выраслі на 15,8% у параўнанні з I кварталам. У тым ліку чыстая аплата працы (за вылікам выплачанага падаходнага падатку) склала за красавік-чэрвень $129,2 млн і павялічылася на 16,8% у параўнанні са студзенем-сакавіком.

Акрамя таго, у красавіку-чэрвені 2014 года грашовыя пераводы працуючых грамадзян склалі $121,8 млн, што на 4,3% больш у параўнанні са студзенем-сакавіком 2014 года.

У красавіку-чэрвені 2014 асабістыя пераводы беларускіх грамадзян за мяжу склалі $35,7 млн і павялічыліся ў параўнанні са студзенем-сакавіком 2014 на 5,9%. У тым ліку аплата працы склала $11,7 млн (рост на 28,6%), грашовыя пераводы працуючых - $24,5 млн (рост на 2,1%).