Генерала МУС паставілі загадваць рынкамі і кавярнямі

Экс-начальнік УУС Гарадзенскага аблвыканкама, генерал-маёр міліцыі Уладзімір Сычэўскі стаў дырэктарам ЗАТ «Гроднагандальсэрвіс».

Прызначэнне генерала МУС надалей моцна ўскладніць любыя хваляванні і забастоўкі ў шматтысячным асяроддзі прадпрымальнікаў, якія гандлююць на найбуйнейшых гарадзенскіх рынках, якія належаць гэтай камерцыйнай структуры, піша блогер d-zholik.

Усяго за паўгода ў мінулым высокапастаўлены міліцэйскі чын змяніў ўжо трэцяе месца працы. Сёлета ў сакавіку генерал Сычэўскі адразу ж пасля дасягнення 55 гадоў указам Лукашэнкі быў адпраўлены на пенсію. Пасля чаго ён быў прызначаны начальнікам Гарадзенскага абласнога ўпраўлення Рэспубліканскага цэнтра ў аздараўленні і санаторна-курортным лячэнні насельніцтва са штатнай колькасцю работнікаў 18,5 адзінак. І вось генерал МУС атрымаў новае, больш выгаднае для яго прызначэнне ў кіраўніцтве буйной бізнэс-структуры.

Закрытае акцыянернае таварыства «Гроднагандальсэрвіс» з'яўляецца гаспадарчым таварыствам з доляй уласнасці дзяржавы, уваходзіць у пералік высокарэнтабельных арганізацый краіны. Яму належыць найбуйнейшы ў рэгіёне рынкавы комплекс «Паўднёвы», які ўключае ў сябе рэчыўны, аўтамабільны і міні- рынкі, 6 іншых міні-рынкаў, размешчаных у розных частках горада, з агульнай колькасцю гандлёвых месцаў блізу чатырох тысяч.

У структуру ЗАТ таксама ўваходзіць вядомы ў г. Гародні гандлёвы дом «Баторыя», раздробная гандлёвая сетка якога складаецца з аднайменнай крамы і крамы «Ратушны», некалькіх міні-кавярняў і інш аб'ектаў, якія размяшчаюцца на тэрыторыях, якія належаць таварыству рынкаў.

Акрамя таго, што генерал міліцыі ў разы выйграў ва ўзроўні свайго заробку ў параўнанні з ранейшай пасадай, гэтае прызначэнне былога начальніка абласнога УУС мае і свае схаваныя мэты.