Звягінцава абвясцілі «ідэолагам генацыду рускіх»

Чалец Грамадскай палаты Расеі, палітолаг Сяргей Маркаў заклікаў рэжысёра Андрэя Звягінцава публічна папрасіць прабачэння за фільм «Левіяфан».

Пра гэта ён заявіў у жывым эфіры радыёстанцыі «Гаворыць Масква». На ягоную думку, стужка занадта негатыўна інтэрпрэтуе расейскую рэчаіснасць, піша Lenta.ru.

«У фільме паказана, што жыццё расейцаў настолькі жудаснае, што і адабраць яго - не такі ўжо вялікі грэх. Гэта значыць, па сутнасці, ён расчалавечвае расейцаў і тым самым з'яўляецца ідэалагічным абгрунтаваннем генацыду расейскага народа. Я б на месцы Звягінцава гэтую стужку зняў з пракату, прыйшоў на Чырвоную плошчу, стаў на калені і папрасіў прабачэння», - адзначыў Маркаў.

Раней аб «антынацыянальным характары» фільма Звягінцава выказаўся кіраўнік КПРФ Генадзь Зюганаў.

18 студзеня стужка «Левіяфан» атрымала прэмію кінакрытыкаў Лондана ў намінацыі «Найлепшы фільм на замежнай мове». 15 студзеня стужка атрымала намінацыю на «Оскар», а да гэтага ўганаравалася «Залатым глобусам».