Яшчэ адна назіральніца не паднялася ў прысутнасці Лукашэнкі: «Я не бачу нагоды, каб уставаць»

Назіральніца Марына Кацярыніч, як і Наталля Гарачка, не паднялася з-за стала, калі Лукашэнка перад галасаваннем падышоў да іх на выбарчым участку №1.

Але Марына, у адрозненне ад Наталлі, не патрапіла ў аб'ектыў журналіста агенцтва Associated Press Сяргея Грыца.

Карэспандэнт «Радыё Свабода» пагутарыў і з назіральнікам Марынай Кацярыніч.

Як распавяла сама Марына, яна не ўважае, што зрабіла нейкі гераічны ўчынак - проста дзяўчына не ўважала неабходным падымацца перад Аляксандрам Лукашэнкам.

Са слоў Марыны, перад візітам Лукашэнкі выбарчы ўчастак адпаведным чынам упрыгожылі, туды з'ехаліся журналісты, а сябры выбарчай камісіі пачалі абмяркоўваць, як паводзіць сябе, калі прыйдзе прэзідэнт:

«Перад гэтым старшыня камісіі падышоў да нас і сказаў, што, урэшце, рабіце, як хочаце: гэта значыць, мужчыны павінны, хутчэй за ўсё, устаць, а жанчыны могуць не ўставаць. Як толькі з'явіўся Лукашэнка, усе астатнія назіральнікі - і мужчыны, і жанчыны - умомант паўскоквалі.

Я мяркую, што я скарысталася сваім правам жанчыны не ўставаць, тым больш, што калі перад гэтым жанчыны прыходзілі галасаваць, мужчыны ж не ўставалі. Я лічу, што гэта нейкія перажыткі савецкага часу, а я заўсёды стараюся неяк ад іх абстрагавацца. Гэта значыць, я не мяркую, што зрабіла нейкі гераічны ўчынак. І я не скажу, што я так зрабіла, каб прынізіць кагосьці. Але я не бачу падставы для таго, каб ўставаць», - адзначыла Марына Кацярыніч.

Дзяўчына не заўважыла і нейкай асаблівай рэакцыі на свой учынак з боку Аляксандра Лукашэнкі.

«Ён проста кіўнуў, і я яму таксама адказала - ну, павіталася, атрымліваецца», - распавядае яна.

З яе слоў, астатнія назіральнікі і сябры камісіі фактычна ніяк не адрэагавалі на гэты інцыдэнт з удзелам незалежных назіральнікаў - прынамсі, з імі на гэтую тэму ніхто не размаўляў.

«Мы (два незалежных назіральніка - РС) наогул фактычна мала што абмяркоўвалі з астатнімі сябрамі камісіі, пераважна размаўлялі паміж сабой. Мы з ёй (Наталляй Гарачка - РС) разам вялі падлік галасоў, а калі неабходна было выйсці, напрыклад, паабедаць, мы з ёй чаргаваліся час ад часу, і менавіта з ёй супрацоўнічалі», - распавяла Марына.

Яна кажа, што незалежныя назіральнікі на выбарчым участку №1 заўважылі істотнае завышэнне прыходу.

«На час заканчэння выбараў я недалічылася 700 чалавек. У тым сэнсе, што, паводле нашых падлікаў, за асноўны дзень галасавання прыйшлі 722 чалавекі на ўчастак, што склала прыблізна 51% за ўсе дні. А паводле вынікаў камісіі ў іх ужо на 14.00 быў 61%, у той час як у нас - толькі 17,44%. А потым высветлілася, што не 722, а недзе 1400 выбаршчыкаў прыйшлі, паводле афіцыйных звестак», - кажа Марына Кацярыніч.

Марына Кацярыніч канстатуе, што ў назіральнікаў фактычна не было магчымасці назіраць за падлікам галасоў выбаршчыкаў:

«Нам фактычна не дазволілі назіраць. Я так ўяўляла, што калі ідзе падлік галасоў, то назіральнікі маюць права ўсё бачыць. Але нас пасадзілі за 4 метры, не было нічога відаць, за каго там былі пастаўленыя галачкі. Сябры камісіі самі вялі падлік галасоў, а потым абвясцілі свой вынік».

Марына Кацярыніч запісалася ў назіральнікі ад Аб'яднанай грамадзянскай партыі, хоць сама не з'яўляецца сябрам ніводнай партыі.