Віктар Сувораў: Украіна мае права аднавіць свой ядзерны патэнцыял

ЗША, Вялікая Брытанія ды Расея адкрыта кінулі Украіну, не выканаўшы ўмовы Будапешцкага мемарандума.

Таму Украіна мае поўнае маральнае права аднавіць свой ядзерны патэнцыял. Пра гэта ў інтэрв'ю выданню «Гордан» заявіў былы савецкі выведнік, які жыве ў Вялікай Брытаніі, пісьменнік і гісторык Віктар Сувораў.

«Парушэнне Будапешцкага мемарандума значна шырэйшае, чым проста ўкраінская праблема. Цяпер ніводная краіна не давярае гарантыям з боку Расеі, ЗША і Вялікай Брытаніі: маўляў, Украіна паверыла, добраахвотна аддала 1240 ядзерных зарадаў і пракалолася. Цяпер ледзь не кожная дзяржава будзе імкнуцца да стварэння ядзернай зброі, бо ўсвядоміла: заходнія джэнтльмены нічога рэальна не гарантуюць», - падкрэсліў Сувораў.

Пісьменнік і гісторык перакананы, што Украіна мае поўнае права аднавіць свой ядзерны патэнцыял, але ні ў якім разе гэтага не афішуючы.

«Украінскі народ павінен раз і назаўжды вынесці з гэтага адзін урок: нікому з заходніх або ўсходніх партнёраў больш ніколі нельга верыць. Дарэчы, Украіна мае поўнае маральнае права аднавіць свой ядзерны патэнцыял. Толькі няма чаго пра гэта на ўвесь свет балабоніць, трэба ціха і без шуму прыступіць да распрацовак. Я цалкам сур'ёзна», - заявіў Сувораў.

Аўтар кніг «Ледакол» і «Акварыум», якія выйшлі шматмільённым накладам, прывёў у якасці прыкладу Ізраіль, які афіцыйна не ўважаецца за ядзерную дзяржаву, але даўно вядзе распрацоўкі гэтай зброі.

«Ізраіль, напрыклад, ніколі афіцыйна не прызнаваў сябе ядзернай дзяржавай, але ў тым, што мудрыя габрэі сёе-тое ядзернае маюць - нават не сумнявайцеся! Чым жа мудрыя ўкраінцы горшыя? Трэба цішком-нішком прыступіць да стварэння ядзернай зброі, а калі прыпячэ, паціснуць плячыма: ой, выпадкова само выйшла, была майстэрня па вырабе ложкаў, а глядзі, што ў выніку атрымалася... Прабачце, але ЗША, Вялікая Брытанія і Расея адкрыта кінулі Украіну. Кожная такая памылка ў міжнароднай палітыцы павінна стаць для ўкраінскай улады трамплінам для новага скачка наперад», - падсумаваў Сувораў.

Будапешцкі мемарандум - пагадненне аб гарантыях бяспекі ў сувязі з далучэннем Украіны да Дамовы аб нераспаўсюджванні ядзернай зброі. У абмен на гарантыі незалежнасці, суверэнітэту і недатыкальнасці межаў з боку ЗША, Расеі і Вялікай Брытаніі Украіна адмовілася ад свайго ядзернага статусу. Мемарандум быў падпісаны 5 снежня 1994 года прэзідэнтам Украіны Леанідам Кучмам, прэзідэнтам ЗША Білам Клінтанам, прэм'ер-міністрам Вялікай Брытаніі Джонам Мейджарам і прэзідэнтам РФ Барысам Ельцыным.