У Расеі за шпіянаж пасадзілі на шэсць гадоў 73-гадовага ўкраінца

Юрый Салашэнка асуджаны да 6 гадоў пазбаўлення волі з адбываннем пакарання ў калоніі строгага рэжыму.

У Расеі за шпіянаж да шасці гадоў пазбаўлення волі ў калоніі строгага рэжыму асудзілі 73-гадовага грамадзяніна Украіны, былога генеральнага дырэктара Дзяржаўнага прадпрыемства «Вытворчае аб'яднанне «Знамя» (Палтава) Юрыя Салашэнку за спробу купіць вырабы для аднаўлення сродкаў СПА Украіны.

Пра гэта УНІАН паведамілі ў прэс-цэнтры ФСБ.

«Пастановай Маскоўскага гарадскога суда грамадзянін Украіны Салашэнка Юрый Данілавіч, былы генеральны дырэктар Дзяржаўнага прадпрыемства «Вытворчае аб'яднанне «Знамя» (Палтава) прызнаны вінаватым ва ўчыненні злачынства, прадугледжанага артыкулам 276 КК РФ «Шпіянаж», і асуджаны да 6 гадоў пазбаўлення волі з адбываннем пакарання ў калоніі строгага рэжыму», - гаворыцца ў паведамленні.

У ФСБ заявілі, што Салашэнка быў затрыманы супрацоўнікамі ФСБ Расеі ў жніўні 2014 года ў Маскве пры спробе незаконнага набыцця сакрэтных дэталяў да зенітна-ракетных комплексаў «С-300». Пры гэтым ён дзейнічаў ад імя Дзяржаўнага прадпрыемства «Завод«Генератар» і Карпарацыі «Неба Украіны», а планаваныя да куплі вырабы прызначаліся для аднаўлення сродкаў СПА Украіны.

Пры гэтым у ФСБ заявілі, што гэта не першы выпадак стрымання органамі бяспекі спроб асобных грамадзян Украіны набыць у Расеі і вывезці кантрабандным шляхам прадукцыю вайсковага прызначэння. Так, у снежні 2014 года з Расейскай Федэрацыі быў выстаўлены грамадзянін Украіны Данчанка Дзяніс Алегавіч, які прыбыў у Маскву з мэтай набыцця ў абыход устаноўленага парадку сакрэтных клістронаў і магнетрона да ЗРК «С-300» і «Бук-М1».