На выставе ў Пецярбургу прадэманструюць шакаладнага Пуціна з сабакам
21- 26.11.2015, 16:31
- 5,831
Кандытары вырабляюць шакаладную постаць прэзідэнта Расеі, якую маюць намер прэзентаваць на V Свяце шакаладу ў Санкт-Пецярбургу.
Уладзімір Пуцін будзе прадстаўлены ў выглядзе "шакаладнай скульптуры ў поўны рост", паведамляе агенцтва FlashNord са спасылкай на арганізатараў мерапрыемства. Яны разлічваюць, што гэта тварэнне патрапіць у Кнігу рэкордаў Гінеса.
"Наколькі нам вядома, у свеце яшчэ не было шакаладнай скульптуры свецкага лідара краіны такіх памераў. Больш за 70 кг чыстага шакаладу і каля 170 см у вышыню", - распавёў суразмоўца агенцтва. Рэальны рост Пуціна, паводле звестак СМІ, складае 167 см.
Шакаладны Пуцін будзе ўсміхацца і "паказваць вялікі палец". Магчыма, ля яго ног будзе сядзець шакаладная сабака, распавёў адзін з арганізатараў фестывалю Міхаіл Любчанка Агенцтву бізнэс-навін.
Аднак паспрабаваць на смак шакаладную постаць расейскага лідара наведвальнікам пецярбургскага фестывалю прысмакаў не давядзецца - яна будзе ўпрыгожваць свята і прастаіць потым яшчэ доўгі час, адзначае газета Metro.
Гэта ўжо не першае ўвасабленне Пуціна ў шакаладзе. У 2013 годзе ў крамах Масквы з'явіўся шакаладны партрэт расейскага прэзідэнта. Усталяваны ў драўляную рамку партрэт Пуціна памерам 30 х 48 см быў выкананы з горкага і белага шакаладу і каштаваў 21000 рублёў.