Рыэлтарам забароняць працаваць па папярэдняй аплаце

Мінюст прапануе забараніць рыэлтарам працаваць па папярэдняй аплаце.

Пра гэта паведаміў сёння міністр юстыцыі Беларусі Алег Сліжэўскі падчас прэс-канферэнцыі, прысвечанай рабоце органаў юстыцыі, паведамляе БелТА.

"Улічваючы, што ўсё часцей рыэлтарскія арганізацыі нядобрасумленна аказваюць паслугі, быў праведзены маніторынг, пасля якога выпрацаваныя пэўныя прапановы ва ўдасканаленні заканадаўства. Прынамсі, мяркуецца выключыць магчымасць унясення папярэдняй аплаты за атрыманне інфармацыі пра памяшканні, якія здаюцца ў арэнду. Мы прапануем замацаваць магчымасць аплаты па факце: зробленая паслуга, укладзеная дамова аб арэндзе – тады робіцца аплата", - сказаў Алег Сліжэўскі.

У 2014 годзе паводле вынікаў праверак у дачыненні да рыэлтарскіх арганізацый вынесена 11 пастаноў аб накладанні адміністрацыйных спагнанняў, 10 арганізацыям накіраваныя прадпісанні аб ліквідацыі выяўленых парушэнняў.

Як паведамлялася, летась дзве рыэлтарскія арганізацыі (ТДА "Інтэрнэйшнл Эстэйт" і ТАА "Аргуссервіс") былі пазбаўленыя ліцэнзій на права аказваць паслугі.

Цяпер рыэлтарскія паслугі аказвае 141 арганізацыя, у якіх працуюць каля 4 тысяч спецыялістаў. Пасведчанні аб атэстацыі рыэлтара маюць 900 асоб.