Падраздзяленні ААТ «МАПІД» пераходзяць на чатырохдзёнку

Курс на згортванне будоўлі ў межах МКАД адбіўся не толькі на камерцыйных, але і на дзяржаўных забудоўшчыках.

Як стала вядома onliner.by, з 26 лютага на падставе загаду генеральнага дырэктара ААТ «МАПІД» Івана Янчарскага шэраг падраздзяленняў прадпрыемства пераходзіць на рэжым чатырохдзённага працоўнага тыдня. Фатаграфіяй загаду з рэдакцыяй падзяліўся адзін з чытачоў.

Як адзначана ў дакуменце, загрузка вытворчых і будаўнічых падраздзяленняў паменшылася. Гэта звязана са «скарачэннем аб'ёмаў жыллёвага будаўніцтва з прычыны адсутнасці падрыхтаваных тэрыторый для масавай забудовы». У ліку спадарожных прычын называюцца: скарачэнне аб'ектаў, уключаных у інвестыцыйную праграму, значнае памяншэнне аб'ёмаў ільготных крэдытных рэсурсаў і скарачэнне катэгорый грамадзян, якія маюць права на дзяржпадтрымку пры будаўніцтве жылля.

У загадным парадку на перыяд з 26 лютага да 27 сакавіка 2015 13 падраздзяленняў МАПІДа пераходзяць на рэжым чатырохдзённага працоўнага тыдня. Гэта СУ-1, Cу-256, Cу-257, УМСР-154, СУ-192, СУ-202, СУ-203, СУ-204, СУ-205, СУ-206, УПТК, УММ, жыллёва-камунальныя паслугі. Аднак пры наяўнасці заказчыкаў, якія забяспечваюць фінансаванне паводле ўкладзеных дамоў, кіраўнікі названых падраздзяленняў могуць арганізаваць працу і ў рэжыме пяцідзённага тыдня. Аплата працы будзе рабіцца прапарцыйна адпрацаванаму часу (пры пачасовай форме аплаты працы) або ў залежнасці ад выпрацоўкі (пры здзельнай форме аплаты працы).

Таксама чатыры дні на тыдзень замест пяці будзе працаваць апарат генеральнай дырэкцыі прадпрыемства.

Губляючы аб'ёмы ў Менску, МАПІД спрабуе замацавацца на рынках у рэгіёнах і за межамі Беларусі. Цяпер прадпрыемства будуе некалькі жылых комплексаў у Калузе, аднак для таго, каб задзейнічаць усе магутнасці, гэтага недастаткова. Буйных заказаў, падобных Каменнай Горцы, найбліжэйшым часам не прадбачыцца.