Браніслаў Камароўскі: Польшча падтрымае адпраўку міратворцаў ААН ва Украіну

Варшава гатовая даць згоду на адпраўку міратворчага кантынгенту на ўсход Украіны, але толькі ў выпадку спынення вайны ў Данбасе.

Пра гэта прэзідэнт Польшчы Браніслаў Камароўскі заявіў у інтэрв'ю Polskie radio, піша ТАСС.

"Украіна можа разлічваць на нашу падтрымку ў рамках запыту аб міратворчых сілах ААН, калі Кіеў звернецца з такой просьбай", - заявіў ён.

Разам з тым, адзначае польскі лідар, ідэя аб міратворцах у зоне АТА і па яе перыметры будзе апраўданая толькі ў тым выпадку, калі там спыняцца ўзброеныя сутыкненні.

"Гэта не проста, бо міратворчыя сілы маюць сэнс, калі існуе замірэнне, а калі ідзе вайна, складана высылаць туды жаўнераў", - дадаў Камароўскі.

Раней падчас кансультацый Рады бяспекі ААН у Нью-Ёрку міністр замежных спраў Украіны Павел Клімкін заявіў, што Украіна настойвае на ўвядзенні міратворцаў ААН для ўстанаўлення міру ў Данбасе.

Фота: prezydent.pl