Ждановічы адрэзалі ад Масюкоўшчыны

Праход, які аддзяляў стыхійную барахолку з боку вуліцы Калеснікава ад «Ждановічаў», заварылі жалезнай агароджай

Жыхары Масюкоўшчыны нарэшце ўздыхнулі з палёгкай. Нарэшце, «блашыны рынак», які прапісаўся ў іх пад бокам больш за год таму, канчаткова з'ехаў. Да гэтага ні скаргі ў мясцовую адміністрацыю, ні рэйды АМАПу, ні санкцыі падатковай службы на сітуацыю паўплываць не маглі. Мясцовыя жыхары скардзіліся на шум, на гора-прадпрымальнікаў, якія крадуць у агародах, п'янкі пад вокнамі, смецце пад платамі і тое, што закуткі сталі нагадваць грамадскую прыбіральню, піша «Комсомольская правда в Беларуси».

Праблему чыноўнікі развязалі радыкальна - праход заварылі металічнымі кратамі. У адміністрацыі Фрунзенскага раёна меры патлумачылі дзвюма прычынамі. Па-першае, тунэль ніколі не быў прызначаны для пешаходаў, яго збудавалі для перагону жывёлы. Па-другое, гэта, бадай, адзіны спосаб, якім сапраўды можна прыкрыць барахолку. Дарэчы, прыпынак «Масюкоўшчына» таксама ліквідавалі.

Знайшліся і незадаволеныя. Многія гады тунэль быў адзіным ходам на «Ждановічы» для жыхароў Каменнай горкі. Цяпер найбліжэйшы праход да Ждановіцкага рынку - за кіламетр ад перакрытага тунэлю. Там жа і канчатковы прыпынак аўтобусаў з боку Каменнай горкі. І, мабыць, у знак пратэсту, многія замест таго, каб зрабіць невялікі крук, наважылі пракласці шлях прама праз чыгуначныя шляхі. На шчасце, пакуль без ахвяр.

Мясцовыя жыхары ўздыхаюць: «Нарэшце з барахолкай скончана». Але шмат хто ўжо збянтэжыўся: «Каму аддадуць зямлю? Наўрад ці пуставаць будзе». Як растлумачылі ў адміністрацыі Фрунзенскага раёна, вызваленую пляцоўку збіраюцца перадаць прадпрыемству «Гаражы, аўтастаянкі і паркоўкі». Так што, хутчэй за ўсё, найбліжэйшым часам мясцовым жыхарам прыйдзецца перажыць яшчэ і вялікую будоўлю. На месцы ранейшай стыхійнай барахолкі плануюць пракласці камунікацыі і ўладкаваць новыя месцы для паркавання аўтамабіляў.

Фота: tut.by