Баевікі ДНР рыхтуюць новы наступ на Дэбальцава і Марыупаль
9- 7.02.2015, 16:02
- 22,115
Тэрарысты збіраюць сілы на дэбальцаўскім і марыупальскім кірунках, рыхтуючыся да наступу.
Пра гэта паведаміў спікер антытэрарыстычнай аперацыі Уладзімір Палявы, піша "Інтэрфакс-Украіна".
"Паводле аператыўных звестак, расейска-тэрарыстычныя войскі акумулююць сілы для далейшых наступальных дзеянняў на дэбальцаўскім і марыупальскім кірунках. Праз непадкантрольныя Украіне адцінкі дзяржаўнай мяжы працягваецца актыўнае перакідванне зброі, боепрыпасаў, паліва з Расеі для патрэб баевікоў", - паведаміў ён на брыфінгу ў суботу ў Кіеве.
Са слоў Уладзіміра Палявога, назіраецца павелічэнне колькасці танкаў, БМП, БТР, сістэм "Град" і "Ураган" ля Дэбальцава і Гранітнага.
Баевікі працягваюць абстрэлы населеных пунктаў на ўсёй лініі размежавання, акрамя таго, яны рабілі спробы штурму апорных пунктаў і блок-пастоў сіл АТА паблізу Рэдкадуба, Аўдзееўкі, Чарнухіна, Міуса, Крымскага.
"Страты тэрарыстаў за ўчорашні дзень склалі 48 забітых і 22 параненых", - праінфармаваў ён.