З лідскага «Беларусбанка» эвакуявалі людзей
4- 8.02.2015, 11:49
- 6,763
Праз падазроны партфель з будынка «Беларусбанка» ў Лідзе былі эвакуяваныя 7 чалавек.
Пра гэта БелТА паведамілі ў Гарадзенскай абласной управе МНС Беларусі.
«Паведамленне аб выяўленні пакінутага без нагляду партфеля ў будынку філіяла ААТ «Беларусбанк» у Лідзе на вуліцы Савецкай паступіла 7 лютага а 14.27. Работнікамі РАУС з памяшкання былі эвакуяваныя 7 чалавек абслуговага персаналу», - распавялі ва ўправе. Падчас аператыўных мерапрыемстваў а 14.35 устаноўлена, што ў партфелі знаходзіліся асабістыя рэчы.
У абласной управе таксама паведамілі аб эвакуацыі грамадзян з аптэкі ў гарадскім пасёлку Воранава. «7 лютага а 13.25 паступіла паведамленне аб выяўленні ў памяшканні аптэкі на вуліцы Савецкай пакінутай без нагляду кардоннай скрынкі. Работнікамі РАУС з памяшкання аптэкі эвакуявана 7 чалавек. А 14.12 падчас аператыўных мерапрыемстваў устаноўлена, што ў скрынцы знаходзіўся посуд», - дадалі там.