Макей просіць ЕЗ аб «канструктыўным дыялогу»
22- 8.02.2015, 13:08
- 14,299
Міністр замежных спраў заклікаў ЕЗ да найхутчэйшага пераводу дзвюхстаронняга ўзаемадзеяння ў «канструктыўнае рэчышча».
Пра гэта сайту charter97.org паведамілі ў прэс-службе МЗС Беларусі.
8 лютага закончыўся працоўны візіт Уладзіміра Макея ў Нямеччыну. Кіраўнік беларускага замежнапалітычнага міністэрства ўзяў удзел у дзейнасці 51-й Мюнхэнскай канферэнцыі ў пытаннях бяспекі, якая з'яўляецца адным з найбольш прадстаўнічых і аўтарытэтных міжнародных форумаў у пытаннях палітыкі бяспекі і супрацоўніцтва ў вайсковай сфэры.
Падчас канферэнцыі Уладзімір Макей правёў дзвюхстароннія сустрэчы з Федэральным міністрам замежных спраў ФРН Франкам-Вальтэрам Штайнмаерам, намеснікам старшыні Еўракамісіі - Высокім прадстаўніком Еўразвязу ў пытаннях агульнай замежнай палітыкі і палітыкі бяспекі Фэдэрыкай Магерыні, міністрамі замежных спраў Італіі, Егіпта, Кеніі, Афганістана, міністрам абароны Пакістана, калегамі з шэрагу іншых краін.
У часе гутарак з прадстаўнікамі з краін ЕЗ міністр аб’явіў падыходы беларускай стараны да далейшага развіцця дыялогу з Брусэлем, заклікаў да найхутчэйшага пераводу дзвюхстаронняга ўзаемадзеяння ў нармальнае канструктыўнае рэчышча. Пры абмеркаванні канфлікту ва Украіне ён падкрэсліў пільную патрэбу найхутчэйшага спынення агню паміж канфліктнымі старанамі. Таксама Уладзімір Макей падаў суразмоўцам беларускія прапановы аб урэгуляванні сітуацыі ў рэгіёне.
У рамках дзейнасці для дывэрсіфікацыі беларускага экспарту з прадстаўнікамі Афганістана, Егіпта, Кеніі і Пакістана абмеркаваныя шляхі інтэнсіфікацыі гандлёва-эканамічнага супрацоўніцтва. Дасягнутыя дамоўленасці аб актывізацыі ўзаемадзеяння ў палітычнай сфэры і на міжнароднай арэне.