10 ідэй, як апрануцца на Дзень Волі
17- 23.03.2015, 15:50
- 42,905
Найлепшыя варыянты для святочнага гардэроба на 25 сакавіка.
Нагадаем, акцыя ў Дзень Волі пройдзе ў Менску 25 сакавіка. Збор удзельнікаў святкавання адбудзецца а 15.00 каля кінатэатра «Кастрычнік», затым плануецца шэсце да парку Дружбы народаў, мітынг з 17.00. Тэматыка мерапрыемства - незалежнасць, салідарнасць з Украінай, пратэст супраць антыдэмакратычнай палітыкі.
«Радыё Свабода» сабрала 10 варыянтаў для святочнага гардэроба на 25 сакавіка. Гэтыя рэчы змогуць спатрэбіцца як падчас шэсця, так і ў сяброўскай кампаніі ў бары за куфлем піва.
1. Інтэрнэт-крама «Stigmata Style»
Інтэрнэт-крама «Stigmata Style» адмыслова да Дня Волі выпусціла цішоткі і байкі з гербам БНР.
Stigmata Style - адна з першых інтэрнэт-пляцовак у Беларусі, якая пачала прадаваць вопратку, посуд і розныя сувеніры з беларускімі гістарычнымі сімваламі, арнаментам і знакавымі датамі для Беларусі.
Сярод прапаноў, якія цяпер ёсць на сайце, цішоткі «Асобны атрад БНР», байкі да 500-годдзя бітвы пад Воршай, з выявай Вітаўта Вялікага і іншыя.
2. LSTR
Яшчэ адна папулярная інтэрнэт-крама, адзенне якой будзе актуальным у Дзень Волі, гэта «LSTR Adzieńnie». За два гады працы брэнд выпусціў дзесятак унікальных рэчаў і задзейнічаў у сваіх фотасесіях усіх зорак музычнай сцэны Беларусі, ад Міхалка да Вольскага.
Крама прапануе цішоткі, кашулі і світшоты з разнастайнымі аўтарскімі «Пагонямі», некалькі тыпаў вышыванак, арнамент і крой для якіх распрацавала Анастасія Глушко, адзіны ў краіне афіцыйны экспэрт ЮНЕСКА ў галіне нематэрыяльнай культурнай спадчыны.
3. Sakolka.by
Фэйсбук-крама «Sakolka.by» да Дня Волі стварыла цэлы шэраг маек, прысвечаных БНР.
А для сваёй калекцыі цішотак «Асобны атрад БНР - II» дызайнер Вадзім Пракопчык распрацаваў сваю філасофію, з якой можна пазнаёміцца тут.
4. Symbal.by
Крама «symbal.by» прапануе 25 Сакавіка надзець класічную футболку з «Паганяй» Яўгена Куліка і Уладзіміра Крукоўскага.
Дарэчы, некалькі дзён таму інтэрнэт-пляцоўка «symbal.by» абвясціла аб адкрыцці афлайн-крамы ў менскім гандлёвым цэнтры «Маскоўска-Венскі», дзе прапануе сапраўдныя вышыванкі, вышымайкі, а таксама цішоткі і байкі, якія падыдуць для Дня Волі, з надпісамі «Жыве Беларусь!» і «Люблю Беларусь!».
5. «Суколка патрыёта»
Крама «Суколка Патрыёта», акрамя вялікага выбару футболак прапануе стыльныя бейсболкі з нацыянальнымі сімваламі.
6. Honar
Брэнд адзення «Honar» анансаваў, што ў красавіку адкрывае свой шоў-рум і дэманструе новую калекцыю.
А пакуль на Дзень Волі можна апрануць што-небудзь з ранейшых калекцый брэнда.
7. «Працуй пільна»
Малады менскі брэнд вулічнага адзення і адзення «Працуй пільна» для ўсіх аматараў шэсцяў і мітынгаў прапануе шапкі, швэдры і курткі са сваіх калекцый «Час адкрываць сябе» і «Калі вы ёсць...»
8. «Беларусам»
Інтэрнэт-крама «Беларусам» спецыялізуецца на вязаных шаліках, швэдрах, а цяпер і камізэльках. Засталося толькі абраць - чырвоную або белую, з «Пагоняй» або арнаментам.
9. Традыцыйная вышыванка
Адзін з заклікаў пры падрыхтоўцы Дня Волі, які прагучаў упершыню ў гэтым годзе: «надзяваем вышыванкі, вышымайкі, народныя строі або апранаем усякую вопратку з арнаментам. Даставайце прыгожыя вышытыя кашулі і спадніцы з бабуліных куфраў, купляйце ў майстроў або ў крамах. У нас ёсць традыцыі і мы іх любім. Нацыянальныя строі вылучаюць і робяць нас асаблівымі».
На сайце моўных курсаў «Мова нанова» з'явіўся спіс з 38 прапаноў, дзе купіць або замовіць сапраўдную вышыванку.
10. Свой малюнак
Калі хочацца быць асаблівым і ўнікальным, то можна раздрукаваць на футболку або майку свой унікальны малюнак, плакат або заклік.
Культурная пляцоўка «Арт-сядзiба» на сваім сайце апублікавала каталог з дзесяткам варыянтаў «Пагоні», якія можна свабодна спампоўваць і выкарыстоўваць ва ўсякіх мэтах.