Ігар Эйдман: Навальнага адмыслова пасадзілі перад забойствам Нямцова

Аляксея Навальнага маглі ізаляваць, каб ён не змог арганізаваць акцыі ў сувязі з забойствам палітыка.

Аб гэтым піша Ігар Эйдман, стрыечны брат Барыса Нямцова, у сваім акаўнце ў сацыяльнай сетцы «Фэйсбук».

«Думаю, Навальнага зусім невыпадкова пасадзілі на 15 дзён непасрэдна перад забойствам Нямцова. Год таму, 24 лютага 2014 года, перад тым, як пачаўся захоп Крыма і агрэсія супраць Украіны, пасадзілі пад арышт іх абодвух (аднаму далі 7, другому - 10 дзён). Я яшчэ тады падумаў: спецыяльна ізалявалі, каб яны не змаглі аператыўна арганізаваць у Маскве пратэстныя акцыі супраць агрэсіі («сапраўдных буйных мала»).

Цяпер пасадзілі аднаго Навальнага за тое, што ён агітаваў пасажыраў метро браць удзел у антыкрызісным маршы. Нямцова, які займаўся тым жа самым, чамусьці гэтым разам не кранулі. Як цяпер стала зразумела, ён у планах уладаў павінен быў знаходзіцца на волі. Забойства відавочна рыхтавалася загадзя. А Навальнага ізалявалі, каб не змог арганізаваць нейкія хваляванні ў сувязі з замахам на паплечніка па апазіцыі (моцна сумняваюся, што ён стаў бы гэта рабіць, але ўлады на ўсялякі выпадак падстрахаваліся)», - піша Ігар Эйдман.

Палітык Барыс Нямцоў быў забіты ў Маскве на Вялікім Маскварэцкім мосце ў ноч на 28 лютага. СК РФ распачаў крымінальную справу паводле артыкулаў «забойства» і «незаконнае абарачэнне зброі». Следства правярае некалькі версій забойства, не выключаючы, што яно было заказным.

У мінулую нядзелю, 1 сакавіка, у Маскве прайшоў жалобны марш памяці Нямцова пад лозунгам «Героі не паміраюць», удзел у якім узялі больш за 50 тысяч чалавек. Акцыі памяці таксама прайшлі ў шэрагу расейскіх гарадоў.