Арышт азербайджанскай журналісткі Хадзіджы Ісмайлавай падоўжаны да 24 траўня

Суд у Баку падоўжыў да 24 траўня тэрмін утрымання пад вартай журналісткі Хадзіджы Ісмайлавай.

Пастанова пра падаўжэнне арышту была абвешчаная пазапланава 6 сакавіка. Следства звязала яго з неабходнасцю далейшага расследавання дзейнасці бакінскага бюро азербайджанскай службы "Радыё Свабода".

13 лютага супраць Хадзіджы Ісмайлавай былі выстаўленыя новыя абвінавачванні - ва ўхіленні ад выплаты падаткаў, нелегальным прадпрымальніцтве і злоўжыванні службовымі паўнамоцтвамі. Журналістка, якая збірала звесткі аб карупцыі сярод урадавых чыноўнікаў, сказала на пасяджэнні ў пятніцу, што абвінавачванні супраць яе сфабрыкаваныя і палітычна матываваныя.

Адзін з кіраўнікоў "Радыё Свабода" Ненад Пеіч заявіў, што справа супраць радыёстанцыі, а таксама абвінавачванні ў адрас Хадзіджы Ісмайлавай у рэальнасці не маюць падстаў. "Мы маем дакументы дзяржаўных ведамстваў аб прызнанні нашых вяшчальных правоў, падатковыя дакументы, вынікі аўдытаў за некалькі гадоў. Усе гэтыя абвінавачванні павінны быць знятыя, а Хадзіджа неадкладна вызваленая", - падкрэсліў Пеіч.

Арышт Хадзіджы Ісмайлавай, узятай пад варту ў снежні, асудзілі міжнародныя праваабарончыя групы. Яны назвалі яе пераслед часткай санкцыянаванай у вышэйшых эшалонах улады кампаніі, якая ставіць мэтай запалохаць і прымусіць замаўчаць незалежных актывістаў і журналістаў.

У снежні мінулага года ў бакінскім бюро "Радыё Свабода" прадстаўнікі пракуратуры правялі ператрус, а затым зачынілі і апячаталі яго. Было сказана, што ператрус праводзіцца ў рамках праверкі бюро як арганізацыі, якая фінансуецца з-за мяжы.