«Дапамагалі на будоўлі і трапілі на 6 мільёнаў падатку»
154- 25.04.2015, 10:27
- 41,822
Як жыхары Маларыты дапамаглі знаёмым на будоўлі дома.
Маладая сям'я з Маларыты папрасіла далёкага сваяка і ягонага суседа дапамагчы паставіць апалубку для залівання падмурка пад дом. Падчас працы на аб'ект з праверкай наляцела падатковая і абавязала двух добраахвотных памочнікаў выплаціць па 3 мільёны рублёў адзінага падатку, піша tut.by.
Вольга і Віталь Жукоўскі цяпер жывуць з бацькамі. Увесь вольны ад працы час маладыя прысвячаюць будаўніцтву свайго дома ў Маларыце. Сёлета ў сакавіку гэтага года наважылі ўсталяваць на ўчастку апалубку для залівання падмурка. Самі справіцца не маглі, падключылі сваякоў і знаёмых. У той дзень, 18 сакавіка, на ўчастку працавалі бацька Вольгі разам са сваім траюрадным пляменнікам і яго суседам.
«Грошай ніякіх яны не бралі, так як працавалі за «магарыч» (за ежу)», - распавяла Вольга.
А 16.00 на пляцоўку прыйшлі супрацоўнікі інспекцыі МПЗ Маларыцкага раёна з пазапланавай тэматычнай аператыўнай праверкай. Высветлілася, што, працуючы «за ежу», як паказана ў тлумачэннях, мужчыны парушылі артыкулы адразу трох дакументаў: Грамадзянскага кодэкса, Падатковага кодэкса і прэзідэнцкага дэкрэту.
У выніку абодва работніка атрымалі папярэджанні аб адказнасці за вядзення прадпрымальніцкай дзейнасці без дзяржрэгістрацыі. Акрамя таго, «добраахвотнікам» налічылі да выплаты па 3 мільёны рублёў адзінага падатку.
Парушальнікі з пастановай падатковай не пагадзіліся і падалі скаргу. Абодва тлумачаць, што ніякай прадпрымальніцкай дзейнасцю яны раней не займаліся і не плануюць.
«Я не вёў ніякіх будаўнічых работ. Тыя гаспадарчыя працы, якія я рабіў на ўчастку, я выконваў на бязвыплатнай аснове. Ніякай аплаты за гэта мне не вялося і такіх дамоўленасцяў не было. Мы, сельскія жыхары, суседзі і сябры імкнемся дапамагаць адзін аднаму» , - патлумачыў у сваім лісце адзін з «добраахвотнікаў».
Аднак іх скаргі засталіся без задавальнення.
Падатковая: «Харчаванне таксама грошай каштуе»
У падатковай Маларыцкага раёна растлумачылі, што ўчастак у той дзень яны наведалі не выпадкова. Напярэдадні супрацоўнікі інспекцыі праводзілі мерапрыемствы пастаноўкі на ўлік аб'ектаў незавершанага будаўніцтва і звярнулі ўвагу, што на ўчастку Вольгі і Віталя працуюць адны і тыя ж людзі.
«У час нашай праверкі там працаваў бацька (Вольгі Жукоўскай). Мы да яго ніякіх прэтэнзій не мелі. Яны (добраахвотныя працоўныя) далі нам тлумачэнні, што яны сапраўды працавалі, вялі паслугі. <...> Яны працуюць і сёння», - распавяла начальніца інспекцыі МПЗ Маларыцкага раёна Ала Вінічук.
Да сцвярджэнняў памочнікаў, што яны працавалі на бязвыплатнай аснове, у падатковай ставяцца скептычна:
«Яны самі напісалі, што за харчаванне [працавалі]. А харчаванне таксама грошай каштуе», - патлумачыла Ала Вінічук.
Як растлумачылі ў падатковай, да іх паступаюць звароты ад мясцовых прадпрымальнікаў са скаргамі на «нелегалаў», якія працуюць без рэгістрацыі:
«Да нас прыходзяць прадпрымальнікі, будаўнічыя фірмы і лаюцца, маўляў, глядзіце, людзі працуюць (без рэгістрацыі), не плацяць падаткі, а мы вымушаныя зачыняцца. Яны да нас прыходзяць і кажуць: едзьце на той участак паглядзіце. Мы едзем».
У Маларыцкай інспекцыі растлумачылі, што з 2015 года за ажыццяўленне некаторых відаў дзейнасці, у тым ліку будаўнічых работ, без рэгістрацыі ў якасці індывідуальных прадпрымальнікаў адзіны падатак вылічаецца зыходзячы з падатковай базы і ставак падатку, устаноўленых у населеным пункце з ужываннем каэфіцыента 5. Такім чынам добраахвотнікам выставілі да аплаты па 3 мільёны рублёў кожнаму: 600 тысяч рублёў стаўкі, памножаныя на пяць.
На пытанне, як засцерагчы сябе грамадзяніну, які наважыў на бязвыплатнай аснове дапамагчы знаёмаму ў будаўніцтве дома, Ала Іванаўна адказала:
«Няхай зарэгіструюцца як ІП. Для Маларыты за месяц - гэта 600 тысяч рублёў».