Дапамог пабудаваць дом сваяку - заплаці падатак

Будаваць свой дом у Беларусі - справа няпростая і нават рызыкоўная. Нядаўні выпадак у Маларыце пацвярджае гэта.

Сям'я і яе добраахвотныя памочнікі перад выходнымі пачалі заліваць падмурак дома, а ў выніку атрымалі...квітанцыю на выплату падатку ў некалькі мільёнаў рублёў. У мясцовай падатковай інспекцыі сцвярджаюць: спыненая спроба незаконнай прадпрымальніцкай дзейнасці, піша «Вячэрні Брэст».

Вольга і Віталь Жукоўскі пажаніліся год таму, у адсутнасць свайго жылля часова перабіваюцца ў сваякоў і мараць звіць сваё гняздзечка. Жонка чакае дзіця, тым мацней хочацца хутчэй зажыць самастойным жыццём. Яшчэ да замужжа Вольга аформіла зямельны ўчастак пад будаўніцтва дома, цяпер муж і жонка планавалі ўзяць крэдыт. Каб не адкладаць у доўгую скрыню, нядаўна сваякі пачалі ставіць апалубку - канструкцыю для залівання падмурка. Праўда, не абышлося без дапамогі з боку. І на табе! У адзін з дзён на ўчастак прыбыла падатковая інспекцыя разам з міліцыяй. Складзены акт пазапланавай тэматычнай аператыўнай праверкі. «Інкрымінуюць» незаконную прадпрымальніцкую дзейнасць.

- Спачатку мне наогул нічога не сказалі, - абураецца Вольга. - Пра ўсё я даведалася толькі ўвечары... На будоўлі быў мой тата, ягоны траюрадны пляменнік са сваім суседам. Вось на тых дваіх і склалі акты, як на чужых. Цяпер кожнаму з іх, атрымліваецца, трэба заплаціць па 3 мільёны рублёў. Нават не ведаю, як быць далей... Дом ва ўсякім выпадку трэба неяк будаваць.

Адзін са сваякоў Вольгі распавёў падрабязнасці інцыдэнту.

- Спачатку мы наогул не зразумелі, чаго ад нас хочуць, - кажа Анатоль. - Неяк запрасіў дапамагчы цесця, ягонага кума і суседа. Цесць дапамагаў куму біць кабана, і той першапачаткова быў не супраць «адпрацаваць». Хацелася дапамагчы маладым, а ў выніку «далі па руках», цяпер баімся што-небудзь рабіць. Паспрабуй дакажы, што ніхто грошай не браў і не даваў. Прыедуць паўторна - бяда будзе.

Спачатку нават не паверылі. Аднак у інспекцыі Міністэрства падаткаў і збораў Маларыцкага раёна пацвердзілі гэты факт. Як распавяла начальніца інспекцыі Ала Вінічук, «староннім», якія знаходзіліся на будпляцоўцы, вынесенае папярэджанне і налічаны падатак - па 3 мільёны рублёў кожнаму. Штраф будзе, калі яны «трапяцца» паўторна.

Згодна з Падатковым кодэксам, калі чалавек выконвае нейкія працы без рэгістрацыі, значыць, ён парушае закон. У гэтым выпадку, напрыклад, былі парушаныя артыкул 22 (п.1) «Прадпрымальніцкая дзейнасць грамадзяніна» Грамадзянскага кодэкса РБ і артыкул 294 (п.1) Падатковага кодэкса РБ, паведамілі ў інспекцыі. У апошнім артыкуле «Аб'ект падаткаабкладання і падатковая база адзінага падатку» гаворка ідзе пра тое, што будаўнічыя працы падлягаюць абкладанню адзіным падаткам, калі робяцца гэтыя паслугі для фізічных асоб. Праблемы з падатковай узнікаюць таму, што чалавек працуе і атрымлівае даход...

Праўда, які прыбытак тут хто атрымаў, журналіст так і не зразумеў. Але ў падатковай інспекцыі ўпэўненыя: проста так ніхто працаваць не будзе. Людзі ехалі з сельскай мясцовасці, траціліся на квіткі ці бензін. Тым больш, яны нідзе не працуюць.

Ала Вінічук удакладніла, што ніякіх новаўвядзенняў у падатковым заканадаўстве не адбылося. Адзінае, з 2015 года падатак у некаторых відах дзейнасці, у тым ліку будаўніцтве, выплачваецца ў пяціразовым памеры. Але ў рознай мясцовасці па-рознаму. У Маларыце, напрыклад, стаўка адзінага падатку для вядзення прадпрымальніцкай дзейнасці складае 600 тысяч рублёў. А ў гэтым выпадку памнажаецца на пяць. Усяго будаўнікам, каб легалізавацца, неабходна выплаціць па тры мільёны рублёў. Памер стаўкі штогод устанаўліваецца пастановай абласнога «савета дэпутатаў». Вось такая атрымліваецца арыфметыка. «Падатак на дапамогу» цяпер не з танных.

Што датычыцца агулам гэтага прэцэдэнту, таго, як ён узнік, то начальніца інспекцыі патлумачыла: напярэдадні супрацоўнікі праводзілі маніторынг, адсочвалі сітуацыю і заўважылі, што на дзялянцы працуюць адны і тыя ж людзі. Таму прыехалі і склалі акт.

Цяпер «будаўнікі» папярэджаныя. На днях яны падалі «апеляцыю» ў вышэйшую інстанцыю - ІМПЗ РБ Берасцейскай вобласці. Знаёмыя, якія трапілі ў няёмкае становішча, жартуюць: можа, гэта ў святле барацьбы з дармаедамі актывізавалася праца?