Менчукоў клічуць працаваць за $200

На менскім кірмашы вакансій, які прайшоў у Менску, знайсці працу з заробкам, роўным сярэдняму па краіне - 6,4 мільёны ў месяц - высветлілася задачай практычна невыканальнай.

У гэтым пераканалася карэспандэнт «Еўрарадыё».

10 раніцы, чарга ў культурна-спартыўны цэнтр Беларускай чыгункі на вуліцы Чкалава. Мужчыны пад 45 і жанчыны неўстаноўленага ўзросту хаваюцца ад дажджу.

На ўваходзе даюць бясплатныя газеты, улёткі, невялікія рэкламкі з вакансіямі. Асноўная маса спецыяльнасцяў - рабочая, такіх тут пад 80%. Але няўдача - працадаўцы шукаюць мужчын, імаверна, жанчынам лавіць няма чаго.

Сетка «Яліна» ў рамонце адзення і абутку. Рукі-галава ёсць, можна навучыцца, але тут чакаюць гатовага спецыяліста. А які заробак?

«Нашы работнікі атрымліваюць дзесьці 4-4,5 мільёна. Хто добра працуе - блізу шасці, - кажа кансультант Аксана. - Я хачу звярнуць увагу на тое, што людзі павінны хацець працаваць як мага больш».

Завод «Інтэграл». Ці ёсць там прапановы для жанчын?

«Вось глядзіце, аператар крышталёвай вытворчасці, тут розныя напрамкі ёсць. Заробак 4,5 мільёна. Калі толькі прыйдзеце працаваць, будзеце атрымліваць дзесьці 3,5 мільёна. Праца пазменная, з 8 раніцы», - перспектыва ўставаць штодня разам з усходам сонца і спяшацца на працу за 3,5 мільёна неяк не прыцягвае.

Крама «Алмі» набірае прадаўцоў, цестафармоўшчыкаў, кухараў, таваразнаўцаў, кладаўшчыкоў, абвальшчыкаў. Прапануе не шмат, але добрая змена - 12-гадзінны працоўны дзень, два праз два, заробак - 4,5 мільёна максімум. Прыкладна такі ж прапануюць і ў іншых крамах - да 5-6 мільёнаў.

«Якая ў вас праца? Я працаваў грузчыкам, кладаўшчыком, 5 мільёнаў мяне задавальняе, пры ўмове, што праца два праз два», - яшчэ адзін шукальнік працы далучаецца да размову - хлопцу блізу 25 гадоў, скончыў БДУ, факультэт... філасофіі і сацыяльных навук. У школу выкладчыкам ісці працаваць не хоча:

«За 2,5 мільёна? Вы смяецеся?! Я ж мужык, зарабляць павінен!» - выкладае сваю пазіцыю грузчык-філосаф. Не пагадзіцца цяжка: зараз заробак 4-6 мільёнаў - 400 даляраў. Мізэр, улічваючы, што адзін паход у краму - гэта мінімум пару сотняў тысяч рублёў!

Гэтыя 4-6 мільёнаў прапануюць, да прыкладу, слесару на заводзе і лекару ў бальніцы.

«У нас недакамплект медперсаналу на 55%! - скардзіцца мне выконваючая абавязкі галоўнага лекара Святлана з 21-й менскай паліклінікі. - Ці не хапае медсясцёр, тэрапеўтаў - вельмі складанае становішча!»

На кірмашы вакансій шмат паліклінік і бальніц. Працу прапануюць лекарам, медсёстрам, санітаркам. Без медыцынскай адукацыі лавіць няма чаго, хіба што стаць санітаркай або рэгістратарам.

Але зноў жа заробак - за нервовую працу рэгістратара плацяць блізу 3 мільёнаў.

«У нас хутка звольніцца, у дэкрэт сыдзе, дзяўчына, вакансія дыспетчара вызваліцца, - па-змоўніцку падморгвае прадстаўніца рытуальнай крамы. Пакуль тут патрэбныя толькі прыбіральшчыкі на могілках. - Вы да нас праз месяц звярніцеся, заробак добры - 4,5 мільёна. Але працуем і па начах».

Перспектыва дзяжурыць па начах у краме рытуальных прыладаў чамусьці палохае.

Нарэшце прапануюць заробак ад 7-8 мільёнаў - вакансія кіроўцы тралейбуса. Толькі трэба навучыцца. Працоўны графік - чатыры дні праз два. І гэта, бадай, адзіная прапанова на кірмашы з заробкам, які перавышае сярэдні!

Ігар Мікалаевіч прыйшоў на кірмаш, каб знайсці працу дачкі. Яна стане спецыялістам толькі праз два гады, заканчвае БДУ, будзе нанафатонікам.

«Але штосьці нічога не знайшоў. Калі яна паступала, я думаў штосьці перспектыўнае, перадавое. Вось прыглядаю працу, але штосьці пуста, - кажа Ігар. - Можа, у Расею якую ехаць, шукаць працу, таму што ў Беларусі нешта ніяк».

Ён губляецца сярод працоўных вакансій: ну не працаваць жа нанафатоніку на хлебакамбінаце №1. Тут патрэбныя прыбіральшчыцы, слесары. Заробак невялікі - да 4,5 мільёнаў.

Рэстарацыя «Васількі», патрэбныя афіцыянты, кухары з досведам працы. Заробак афіцыянта невялікі.

«2,5 мільёны, плюс матывацыя, плюс прэмія, плюс гасцінцы. Не магу вам сказаць, колькі гэта, ды і не кожны афіцыянт пра гэта скажа», - кансультуе дзяўчына.

Але ў крызіс гасцінцы - рэч не надзейная. «Да прыкладу, у нас пакідаюць гасцінцы і 600 еўра, і пяцьсот тысяч рублёў, і дзвесце. Той, хто зарабляе, пакідае чаявыя добрыя, зразумела, гэта адбываецца не кожны дзень», - абнадзейвае яна.

У аддзел адукацыі Маскоўскага раёна патрэбныя вартаўнікі і педагогі. Дзяўчыны з аддзела кадраў, пачуўшы пра педагагічную і філалагічную адукацыю і досвед работы, радуецца.

«У вас добрыя арганізатарскія магчымасці, гэта адразу відаць. Да таго ж вы ўмееце з людзьмі камунікаваць. Гэта таксама плюс. Ідзіце да нас педагогам-арганізатарам, мы вас вельмі чакаем. А калі займаецеся фларыстыкай, керамікай - гэта наогул плюс, вас з рукамі адарвуць!» - гэта, бадай, першае месца, дзе мяне былі рады бачыць у якасці супрацоўніка.

Але што з заробкам? «3,5 мільёна, як маладому спецыялісту. Не больш!»