Вядомаму бяздомнаму мастаку з Гомеля сабралі грошы на дом
13- 25.05.2015, 21:01
- 8,993
Бяздомны мастак з Гомеля Валерый Ляшкевіч, які 20 гадоў жыве на вакзале, неўзабаве будзе мець уласны дом.
Дзякуючы фестывальным вандроўкам дакументальнага фільма рэжысёркі Анастасіі Мірашнічэнкі "Скрыжаванне", у якім распавядаецца пра мастака, пра ягоныя праблемы даведалася шмат людзей, піша "Беларускі партызан".
"За год з невялікім нам удалося сабраць больш за 12 тысяч даляраў. Нас вельмі кранула, што людзі з розных краін пасля кожнага прагляду фільма не заставаліся абыякавымі гледачамі - наважваліся дапамагчы Валерыю. За гэты час мы прадалі рэкордную колькасць ягоных карцін - арыгіналаў і рэпрадукцый. Людзі пералічвалі грошы на дабрачынны рахунак або перадавалі праз нас. Мы ўдзячныя ўсім, хто браў удзел у праекце, усім, хто нас падтрымліваў і натхняў!" - напісала Анастасія ў сваім Фэйсбуку.
Увага да мастака і ягонай творчасці ўзрасла пасля даволі недоўгачасовага пражывання ў Санкт-Пецярбургу, дзе неабыякавыя гараджане пачалі прыглядаць за ім і нават стварылі дабрачынны рахунак.
Пра лёс мастака быў зняты дакументальны фільм, які адзначаны некалькімі ўзнагародамі, яго аўтары паспрабавалі дапамагчы ў набыцці для яго вясковага дома пад Гомелем. Частка грошай была сабраная, але далей справа не пайшла.
Працы мастака ў мінулым годзе выстаўляліся ў Нацыянальным мастацкім музеі.