Кадыраў дазволіў 57-гадоваму начальніку РАУС узяць другую 17-гадовую жонку

Кіраўнік Чачні дазволіў кіраўніку Нажай-Юртаўскага РАУС Нажуду Гучыгаву ўзяць сабе ў якасці другой жонкі 17-гадовую школьніцу.

У эфіры мясцовай тэлевізіі Рамзан Кадыраў паведаміў, што ён даручыў спытаць, ці згодныя бацькі дзяўчынкі на вяселле, і высветліў, што ў іх няма пярэчанняў. Ці пыталіся меркаванне самой дзяўчынкі, кіраўнік Чачэніі не ўдакладніў, піша «Медуза».

57-гадовы Нажуд Гучыгаў наважыў жывасілам узяць у жонкі 17-гадовую Хеду Гайлабіеву з сяла Байтаркі. Ён прыстрашыў сям'ю карай і паабяцаў забраць дзяўчыну 2 траўня. На ўездах у сяло Гучыгаў, паводле звестак выдання, расставіў блок-посты, каб ягоная выбранніца не збегла.

Журналістка «Новой газеты» Алена Мілашына пісала, што аб гэтай гісторыі ёй стала вядома ад суседзяў сям'і Гайлабіевых. У той жа дзень, 30 красавіка, ёй выпала пагаварыць праз тэлефон з начальнікам РАУС. Той, са слоў журналісткі, запэўніў яе, што ён ужо мае жонку, а з Хедай Гайлабіевай ён нават не знаёмы. Аднак 7 траўня высветлілася, што гісторыя дайшла да Кадырава, і ён нават у яе ўмяшаўся.

Вяселле адбудзецца 10 траўня. На яе запрошаны кіраўнік Чачэніі.

Дзвюхжэнства забаронена заканадаўствам Расеі. Шлюбны ўзрост у краіне - 18 гадоў. У выключных выпадках шлюб можна ўзяць з 16 гадоў.

Такім чынам, фактычна Нажуд Гучыгаў бярэ 17-гадовую школьніцу ў палюбоўніцы. Прычым гэта не першая ягоная спроба. Пэўны час таму жыхары Нажай-Юртаўскага раёна вымушаныя былі вывезці з Чачні сваю дачку, каб не дапусціць ейнага вяселля з усёмагутным кіраўніком мясцовага РАУС.

Рамзан Кадыраў неаднаразова заклікаў зрабіць шматжэнства ў Чачні легальным. «У нас у Чачні жанчын больш, чым мужчын. Але ўсе яны павінны быць уладкаваныя ў жыцці. Шматжэнства дазваляюць нашы звычаі, наша рэлігія», - казаў ён у 2009 годзе.