Еўракамісія пра скандал у FIFА: Карупцыі няма месца ў спорце
2- 1.06.2015, 15:01
- 10,796
Еўразвяз не ўмешваецца ў дзейнасць незалежных арганізацый, але карупцыі ў спорце не павінна быць.
Пра гэта заявіла сёння прадстаўніца Еўракамісіі Наталі Вандзістад, каментуючы карупцыйны скандал у FIFA, паведамляе "Укрінфарм".
"Мы не каментуем асобы ў кантэксце пераабрання прэзідэнта FIFA. Але, што мы можам сказаць - карупцыі няма месца ў спорце. Цяпер настаў час для пераменаў. На парадку дня - прыстойнасць у футболе. Мільёны фінаў у свеце заслугоўваюць лепшага", - адзначыла Вандзістад.
Яна таксама адзначыла, што пытанне пра байкот чэмпіянату свету ў футболе ў Расеі у 2018 годзе не стаіць у парадку дня Еўракамісіі. "Але мы прадоўжым маніторыць развіццё падзей у расследаванні аб FIFA", - дадала прэс-сакратарка.
Нагадаем, 27 траўня паводле запыту ФБР ЗША ў Цюрыху былі затрыманыя адразу некалькі высокапастаўленых футбольных чыноўнікаў. Усяго паводле справы аб карупцыйных злачынствах праходзяць 14 чалавек, у тым ліку два віцэ-прэзідэнты FIFA.
У той жа дзень у Швэйцарыі былі заведзеныя крымінальныя справы ў сувязі з выбарам краін-гаспадынь чэмпіянату свету ў футболе 2018 і 2022 гадоў. Нягледзячы на расследаванне паводле падазрэння ў карупцыі ў дачыненні да вышэйшых чыноўнікаў, федэрацыя пакуль не плануе пераглядаць месца правядзення мундыялю 2018 і 2022 гадоў.
Разам з тым, у кампаніі-аператары сістэмы банкаўскіх плацежных аперацый VISA спадзяюцца, што міжнародная футбольная арганізацыя "распачне неадкладныя захады" для зняцця падазрэнняў у карупцыі, у адваротным выпадку яны могуць перагледзець спонсарскі кантракт.