Праз спёку ў Менску закрываюцца гандлёвыя месцы на рынках

Нязвыклая для Менска спякота не самым найлепшым чынам адбілася на харчовым бізнэсе.

Ужо ў пятніцу гарадская санінспекцыя паведаміла пра першыя закрыцці гандлёвых месцаў: у парку Горкага, на Чыжоўскім рынку і ў гастраноме «Дзівосны» прадаўцы не былі гатовыя да высокіх тэмператур. На прылаўках знайшлі сапсаваную прадукцыю. У выхадныя была закрытай частка месцаў у Ждановічах, а яшчэ на Камароўскім рынку. Onliner.by даведаўся падрабязнасці.

Не вытрымалі выпрабавання спякотай за мінулыя выхадныя 63 крамы ў Менску. Усе яны часова не працуюць. Што тычыцца рынкаў, справа дайшла да поўнага закрыцця толькі ў адным выпадку.

«У сувязі з гарачымі ўмовамі надвор'я 2-3 ліпеня санслужба была вымушаная прыпыніць эксплуатацыю Чыжоўскага рынку. Тэмпература паветра ў гандлёвай зале складала каля 32-34 градусаў цяпла. Частка гандлёвых месцаў зачыненыя на Камароўскім рынку, у Ждановічах», - заявіла галоўны дзяржаўны санітарны лекар Менска Наталля Жукава.

«Нічога экстрэмальнага ў працы ў такіх тэмпературных варунках няма, - запэўнілі ў адміністрацыі Камароўскага рынку. - Мы часова закрылі гандлёвыя месцы з фаршам, карэйскімі салатамі, тортамі, пірожнымі і іншымі кандытарскімі вырабамі. Усе астатнія павільёны працуюць. Мінулым летам таксама былі вельмі гарачыя дні, і мы закрывалі гандлёвыя месцы з прадуктамі, якія хутка псуюцца. Гэта звычайная практыка, нічога звыш нормы ў нас не адбываецца. Сёння на рынку сандзень. Цалкам праветрываем памяшканне, адкрытыя ўсе дзверы».

Сёння работнікаў харчовай сферы чакае яшчэ адзін няпросты дзень. Метэаролагі аб'явілі аранжавы ўзровень небяспекі: тэмпература паднімецца да 36 градусаў.