У ЗША сутыкнуліся больш за 50 аўтамабіляў

Не меней як тры чалавекі загінулі і дзесяткі пацярпелі ў выніку ДТЗ з удзелам больш за 50 аўтамабіляў у амерыканскім штаце Пенсільванія.

Аварыя адбылася за 120 км на паўночны захад ад Філадэльфіі. Груда пабітых аўтамабіляў перагарадзіла тры паласы, паведамляе Расейская служба ВВС са спасылкай на мясцовыя ўлады.

Як паведамілі экстранныя службы штата, 40 чалавек былі шпіталізаваныя, яшчэ 70 дастаўленыя ў часовы прытулак. Тры чалавекі знаходзяцца ў крытычным стане, паведамілі ў медыцынскім цэнтры Ўніверсітэта штата Пенсільванія.

Аўтамабілі сутыкнуліся пры дрэнных умовах надвор'я: спалучэнне завеі і галалёду. Са слоў відавочцаў здарэння, надвор'е рэзка змянілася перад аварыяй, праз што бачнасць стала практычна нулявой.

«Раптам пачаўся снег, і ўсё зацягнула белай імглой. Машына наперадзе нас проста знікла», - распавяла NBC News кіроўца Эшлі Фішэр. Сваю машыну яна спыніла, але на яе вачах некалькі аўтамабіляў сутыкнуліся на слізкай дарозе.

Метэаралагічныя службы рэкамендавалі жыхарам паўночна-ўсходніх рэгіёнаў ЗША не пакідаць свае дамы праз «небяспечныя для жыцця тэмпературы».