Будаўнік з дзяржкампаніі: з заробку вылічвалі грошы, а калі пачаў разбірацца - звольнілі

Работнік з Гарадзенскай вобласці сцвярджае, што некалькі месяцаў з заробку ў дзяржарганізацыі вылічваюць 20%.

Аб дзівацтвах у аплаце працы распавёў работнік будаўнічай арганізацыі Гарадзенскай вобласці. Летась Аляксандр заўважыў, што з заробку раптам пачалі адымаць энную суму, паведамляе сайт onliner.by. Самастойнае расследаванне выніку не дало. Прыроду вылічэнняў ніхто не патлумачыў, а малады чалавек пазбавіўся працы.

Аляксандру 24 гады, ён жыве з жонкай і двума дзецьмі. Старэйшае дзіця ўжо ходзіць у школу, малодшаму 1,5 гады, жонка знаходзіцца ў дэкрэтным адпачынку. Звальненне маладому будаўніку прыпадае зусім недарэчы.

- Працую бетоншчыкам у Карэліцкім МПМК-152, - распавёў Аляксандр. - Гэта філіял кампаніі «Гроднааблсельбуд». З лістапада 2015 года ў нашай арганізацыі, акрамя ўсіх асноўных падаткаў, сталі вылічваць яшчэ 20% ад заробка. На пытанне, чаму такія вялікія адлічэнні, дырэктар і галоўны бухгалтар спаслаліся на загад ад «Гроднааблсельбуда». Тут усе работнікі і прыціхлі. У наступным месяцы тая ж сітуацыя.

Для Аляксандра адлічаная сума - не маленькая, і ён наважыў разабрацца ў сітуацыі.

- У студзені 2016 узяў працоўны адпачынак. Пайшоў у нашу арганізацыю і папрасіў падаць мне дакументы, у якіх будзе дакладна пазначана прычына адлічэнняў. Мне далі тры лісты паперы, у якіх нічога падрабязнага не было пазначана, і сказалі, што гэтыя паперы прыйшлі з «Гроднааблсельбуда», на іх загад і вылічваецца адсотак. Праз тэлефон я звярнуўся ў мясцовую ахову працы. Мяне ўважліва выслухалі і паабяцалі ператэлефанаваць. Дачакаўся званка я назаўтра ў другой палове дня. Сказалі, што ўсе вылічваецца згодна з правам. Тады я звярнуўся ў «Гроднааблсельбуд» са сваім пытаннем. Там мне адказалі, што не маюць дачынення да гэтай сітуацыі, і паабяцалі разабрацца. Блізу трох тыдняў я чакаў адказу. За гэты час мне дадому ў заказным лісце прыйшоў загад пра непадаўжэнне майго кантракту (ён заканчваецца ў мяне 4 сакавіка). Цяпер я дапрацоўваю тэрмін кантракту, - распавёў Аляксандр.

У аддзеле кадраў Карэліцкага МПМК-152 растлумачылі прычыну непадаўжэння кантракту з Аляксандрам.

- Вы ж чулі, што ў Менску скарачаюцца будоўлі, у будаўніцтве ўсюды крызіс. У нас стратнае прадпрыемства. Мы не можам забяспечыць усіх людзей аб'ёмам будаўніча-мантажных работ. Не асоба кваліфікаваных работнікаў, у якіх заканчваецца кантракт, звальняюць. Аляксандр - адзін з першых, і не таму, што ён напісаў скаргу. Парушэнняў па аплаце няма, проста ў чалавека заканчваецца кантракт. Ён папярэджаны за месяц, - распавялі ў аддзеле кадраў.