«Крумкачы» падалі дакументы на атрыманне ліцэнзіі вышэйшай лігі
4- 9.02.2016, 21:10
- 24,783
На пачатку сакавіка Беларуская федэрацыя футбола вызначыць, ці можа клуб Дзяніса Шунто выступаць разам з БАТЭ, "Шахцёрам" і "Дынама".
Тэрмін падачы дакументаў на атрыманне ліцэнзіі вышэйшай лігі заканчваецца 10 лютага. "Гэта больш тэхнічны момант. Усе іншыя клубы таксама падалі патрэбныя дакументы", - кажа Дзяніс Шунто ў каментарах для "Еўрарадыё".
Дырэктар "Крумкачоў" перакананы, што клуб атрымае ліцэнзію: "Як зазвычай, палова клубаў яе не атрымае з першага разу. Будуць падаваць апеляцыю. Але я ўпэўнены, што мы атрымаем. У "Крумкачоў" няма запазычанасці перад футбалістамі, мы выканалі ўсе ўмовы".
Вядомасць да ФК "Крумкачоў" прыйшла ў канцы восені мінулага года, калі клуб Дзяніса Шунто нечакана праткнуўся ў вышэйшую лігу, падолеўшы ў вызначальным матчы магілёўскі "Дняпро". Пры гэтым сэзон 2015 года для "Крумкачоў" быў першым у першай лізе, раней яны выступалі ў другой.
ФК "Крумкач" з'яўляюцца напаўпрафесійнай камандай. Значная частка футбалістаў у асноўны свой час займаецца зусім іншымі справамі - будаўніцтвам або гандлем. У выпадку атрымання ліцэнзіі ФК "Крумкачы" стануць першым цалкам прыватным клубам, які будзе выступаць у вышэйшай лізе Беларусі.