Фядыніч: Улада, якая пакінула людзям толькі прымусовую працу, павінна сысці

Уладзе няма пра што рапартаваць людзям 1 траўня, таму дзень салідарнасці працоўных у Беларусі ігнаруецца.

Пра гэта ў інтэрв'ю charter97.org заявіў старшыня Беларускага прафзвязу работнікаў радыёэлектроннай прамысловасці (РЭП) Генадзь Фядыніч

- Дзень салідарнасці працоўных 1 траўня ў Беларусі адзначалі без асаблівага балявання. У чым, на вашую думку, прычына таго, што беларускія ўлады фактычна ігнаруюць гэтае свята?

- Гэта было зроблена таму, што ўладам няма пра што распавядаць сёння. Ва ўсім свеце 1 траўня ўважаецца за свята працы. А ў Беларусі ўлады давялі грамадзян да таго, што ў іх засталася толькі праца, а свята няма.

Праца, якая не своечасова аплачваецца, якая аплачваецца вельмі нізка, падчас якой часта не выконваецца тэхніка бяспекі. Вось што такое сучасная Беларусь, і што такое першага траўня ў нашай краіне.

Афіцыйная Федэрацыя прафсаюзаў правяла 1 траўня спартыўныя мерапрыемствы ў парку Горкага і заяўляе, што выдаткавала на гэта процьму грошай. А што тады казаць аб кожным канкрэтным прадпрыемстве? Ва ўладаў «сацыяльна арыентаванай» дзяржавы не засталося ні сродкаў, ні жадання адзначаць свята працы.

Таму я мяркую, што ўлада свядома пайшла на нівеліраванне свята 1 траўня, нічога не плануючы і прыкрываючыся велікоднымі днямі. Каб і далей замоўчваць праблемы вакол нястачы працоўных месцаў, вакол узроўню аховы працы.

- Ці будзе тэндэнцыя на «згортванне» свята 1 траўня захаваюцца і надалей?

- Можна сказаць, што пазіцыя ўладаў і пазіцыя афіцыйнай Федэрацыі прафсаюзаў - ігнараванне 1 траўня - гэта адно і тое ж. Відавочнае іх жаданне нівеліраваць гэтае свята, не паказваць усіх цяжкасцяў.

А праблем у людзей становіцца ўсё больш: гэта і вялізныя затрымкі заробку, і збядненне народу наогул.

Улады не зацікаўленыя ў рэальнай ацэнцы сітуацыі. Для выгляду яны толькі могуць «параіцца» на сваім «сходзе», куды пускаюць толькі з пропускамі.

Улада, якая давяла краіну да такога стану, адназначна, павінна сысці. Гэта было б натуральна для кожнай нармальнай дзяржавы: улады не выканалі ніякіх абавязанняў за мінулую пяцігодку. Таму яны павінны скласці з сябе паўнамоцтвы і даць папрацаваць тым, хто можа прапанаваць рэальныя механізмы выхаду з крызісу.