Як будуюць новую бальніцу для Лукашэнкі за 100 мільёнаў еўраў

Паводле пашпарта, здаць аб'ект павінны да 31 снежня 2017 года.

Указ аб будаўніцтве спецбальніцы для чыноўнікаў у пасёлку Ждановічы пад Менскам Лукашэнка падпісаў яшчэ ў 2014 годзе. У комплекс будынкаў Клінічнага медыцынскага цэнтра пераедуць аддзяленні з цэнтра сталіцы - чатыры корпусы Рэспубліканскага клінічнага медыцынскага цэнтра Кіраўніцтва справамі прэзідэнта (у народзе - лечкамісіі), якія цяпер размяшчаюцца на вуліцах Энгельса і Чырвонаармейскай. Пасля пераезду бальніцы ў Ждановічы будынкі ў цэнтры пяройдуць гораду, паведамляе tut.by.

Мяркуючы паводле дакументаў, у новым медцэнтры плануецца стварыць тыя ж аддзялення, што і ў лечкамісіі, і абсталяваць яго найноўшым абсталяваннем, як лячэбным, так і дыягнастычным. Будзе ў новым медцэнтры і цэлы VIP-блок з асобнымі ўваходамі, ліфтам. Да яго прыкладаецца свая кухня, сталовая, пакоі адпачынку, пакоі для аховы і медперсаналу. Арыенціровачны кошт аб'екта, паводле дакументаў, - блізу 100 мільёнаў еўраў.

Будуюць аб'ект у даволі маляўнічым месцы - прама ў сасновым бары, недалёка ад прэзідэнцкай рэзідэнцыі «Дразды». Да берага канала Вілейска-Менскай воднай сістэмы ад будынка даслоўна пара хвілін хады.

Цяпер на будаўнічай пляцоўцы больш за дзесятак будаўнічых будак, актыўна вядуцца работы. Тэрыторыя агароджаная плотам, за які нікога не пускаюць.

Паводле пашпарта, здаць аб'ект павінны да 31 снежня 2017 года.

- Вядома, дабудуем да 17-га, - коратка адказвае адзін з будаўнікоў, якія працуюць на пляцоўцы.

- Ды дзе там, дзе вы чулі, каб у нас у тэрмін будавалі? - смяецца іншы.

- Гэта ж прэзідэнцкі аб'ект! Не будзем паспяваць, так прыедуць і растлумачаць, як паспець!