Незалежны прафзвяз у Барысаве: Людзі працуюць практычна дарма

Жыхарам Барысава даводзіцца працаваць за $100.

Чалец прафзвязу РЭП Марына Статкевіч распавяла praca-by.info, як ідуць справы з пошукам працы ў Барысаве.

- У Барысаве блізу 40 прамысловых прадпрыемстваў. І амаль усе яны сёння знаходзяцца ў дабітым стане. Узровень заробкаў мізэрны, - паведаміла Марына Статкевіч.

«Увосень я манітора вакансіі па працаўладкаванні, выкладзеныя на сайце райвыканкама. Толькі 20% з іх (дзесьці сотня вакансій) прапаноўвалі заробак прыблізна 5 мільёнаў рублёў. У асноўным людзям прапаноўвалі ісці працаваць за 2,5-3,5 мільёна.

Знаёмы нядаўна распавядаў: ягоны сын доўга нікуды не мог уладкавацца. У выніку пайшоў на 140-ы рамонтны завод працаваць кіроўцам кара за 2,3 мільёна рублёў на месяц. Гэта блізу 100 даляраў - ды такім дапаможнік у беспрацоўі павінна быць! Людзі працуюць практычна дарма і гэта вельмі сумна.

У свой час я прыблізна 10 гадоў прапрацавала на прыборабудаўнічым заводзе інжынерам-матэматыкам. Гэта было квітнеючае і багатае прадпрыемства, якое працавала на вайсковую замову. Калі Савецкі Саюз разваліўся, завод яшчэ неяк трымаўся, але цяпер былыя калегі распавядаюць, што ён практычны мёртвы.

Увогуле, у сувязі з дэградацыяй прамысловасці, знайсці годную працу ў Барысаве стала практычна немагчыма», - распавяла сябра прафзвязу РЭП.