У Менску забаранілі пікет за захаванне парку на Цнянцы
6- 24.05.2016, 15:08
- 4,967
Пікет планавалася правесці 27 траўня на пляцоўцы каля ўніверсама па вуліцы Мірашнічэнкі.
Менгарвыканкам забараніў пікет у абарону парку на Цнянскім вадасховішчы, паведаміў БелаПАН каардынатар кампаніі «Генплан - для менчукоў!» Дзяніс Кобрусеў.
Пікет планавалася правесці 27 траўня на пляцоўцы каля ўніверсама па вул. Мірашнічэнкі, 3, з 17.00 да 20.00. Асноўная мэта - інфармаванне грамадзян аб будаўніцтве аб'екта «Фізкультурна-аздараўленчы комплекс з тэніснымі кортамі ў раёне вуліц Мірашнічэнкі - Варапаеўская» і збор подпісаў пад зваротам аб прыпыненні будоўлі да правядзення грамадскага абмеркавання аб'екта.
Гарадскія ўлады аргументавалі прычыну адмовы ў правядзенні пікета тым, што «на пляцоўцы каля ўніверсама запланаванае правядзенне іншага мерапрыемства».
«Адмова ў правядзенні пікета - гэта тактыка гарадскіх уладаў збіваць рэзананс і грамадскую ўвагу да праблемы знішчэння парку на Цнянцы і незаконнай будоўлі. Раней раённыя ўлады абяцалі правесці інфармацыйную сустрэчу з жыхарамі - абяцанне не стрымалі, абяцалі не знішчаць бярозавы гай - і хутка пачалі яго спілоўваць. Мы бачым спробы зацягнуць развязанне праблемы, каб паспець спілаваць усё запланаванае, каб гараджанам няма чаго было абараняць», - мяркуе Кобрусеў.
Аднак, паводле ягоных слоў, актывісты грамадскай кампаніі «Генплан - для менчукоў!» 24 траўня накіравалі яшчэ сем заяваў на правядзенне пікетаў на гэтай жа пляцоўцы з 9 да 15 чэрвеня.
Як паведамлялася раней, з красавіка ў раёне вуліц Мірашнічэнкі - Варапаеўская вядуцца работы для падрыхтоўкі пляцоўкі да будаўніча-мантажных работ у будаўніцтве фізкультурна-аздараўленчага комплексу з тэніснымі кортамі. Ужо выкарчаваныя маладыя дрэвы, спілаваная частка дарослых дрэў, прыбраныя тратуарныя дарожкі, зняты грунт.