Беларуская бягуха перамагла ў звышмарафоне ў Даўгаўпілсе
2- 30.05.2016, 21:31
- 27,862
Спартоўка з Беларусі Таццяна Гурская перамагла ў звышмарафоне - бегу на дыстанцыю 100 км у Латвіі.
Пра гэта паведамілі БелТА ў клубе аматараў бегу "Аматар".
Бягуха пераадолела 37 колаў, выдаткаваўшы на гэта больш за 10 гадзін. Таксама ў спаборніцтвах узялі ўдзел беларускія спартоўцы Уладзімір Кандыба, Ігар Навіцкі, Анатоль Лапуць і Валерый Круглікаў. Яны прабеглі дыстанцыю 50 км, стаўшы пераможцамі ў сваіх узроставых групах.
Пры гэтым Таццяна Гурская ўзяла ўдзел у дабрачыннай акцыі, якую арганізаваў адзін з беларускіх аператараў мабільнай сувязі. Акцыя прымеркаваная да Міжнароднага дня абароны дзяцей - 1 чэрвеня.
Кожны яе ўдзельнік пераадольвае дыстанцыю на спаборніцтвах са смартфонамі, якія фіксуюць адлегласць з дапамогай фітнэс-дадатку. Вынік выкладваецца ў сацсеткі, і дыстанцыя канвертуецца спонсарам у грошы з разліку Br20 тысяч за 1 км. Усе гэтыя сумы пералічваюцца на рахунак Івянецкага дома-інтэрната, дзе выхоўваюцца дзеці з асаблівасцямі фізічнага развіцця. Такім чынам беларуская бягуха зарабіла для дома-інтэрната Br2 млн.