Папскі легат перадасць беларускім грэка-каталікам рэліквію святога Язафата Кунцэвіча
1- 1.07.2016, 15:08
- 5,810
Перадача святыні адбудзецца ў часе урачыстасці ў Будславе 1-2 ліпеня.
Легат Папы Францішка арцыбіскуп Вены кардынал Крыстаф Шонбарн падчас урачыстасці ў Будславе перадасць беларускім грэка-каталікам рэліквію арцыбіскупа Язафата Кунцэвіча, паведамілі БелТА ў Рымска-каталіцкай царкве ў Беларусі.
Крыстаф Шонбарн прызначаны папскім пасланцом на святкаванне 25-годдзя заснавання Менска-Магілёўскай мітраполіі, якое пройдзе ў Нацыянальным санктуарыі ў Будславе 1-2 ліпеня.
Напярэдадні ён прыбыў у Менск. У Будславе кардынал Крыстаф Шонбарн разам з Мітрапалітам Менска-Магілёўскім арцыбіскупам Тадэвушам Кандрусевічам возьме ўдзел у начной працэсіі са свечкамі, а таксама ў галоўным набажэнстве 2 ліпеня.
"Візіт кардынала асаблівы для Рымска-каталіцкай царквы ў Беларусі. Ён таксама сустрэнецца з прадстаўнікамі Беларускай праваслаўнай царквы і мае падарунак для невялікай Грэцка-каталіцкай царквы ў Беларусі", - гаворыцца на сайце Венскай архідыяцэзіі.
Частка арцыбіскупскага адзення Язафата Кунцэвіча, які прыняў пакутніцкую смерць у 1623 годзе, стане аб'ектам шанавання і блаславення для беларускіх грэка-каталікоў.