Да медыкаў ужо дастаўляюць дзяцей, якія праглынулі беларускія манеты

Медыкі прагназуюць, што колькасць такіх выпадкаў будзе павялічвацца.

У мінулыя выходныя ў сталічны РНПЦ дзіцячай хірургіі быў дастаўлены трохгадовы хлопчык, у верхнім звужэнні стрававода якога захрасла манета, піша naviny.by.

Маленькі мянчук быў шпіталізаваны, пад наркозам манета была вынятая. Ужо на наступны дзень хлопчыка выпісалі. Як высветлілася, дзіця надоечы пакаштавала манету вартасцю 50 капеек.

А ўжо сёння ў РНПЦ з такой жа праблемай - праглынутай манетай - даставілі яшчэ адное дзіця. «І колькасць выпадкаў будзе павялічвацца», - адзначыў лекар-хірург Вячаслаў Ігнаценка.

Для дзіцячых лекараў увядзенне ў абарачэнне манет, сапраўды, стала трывожнай навіной. Малыя, як вядома, усе цягнуць у рот - гэта адзін са спосабаў знаёмства з навакольным светам, і кідкія, бліскучыя маленькія колцы, вядома, будуць прыцягваць іх увагу.

«На жаль, прафілактычная інфармацыйная праца практычна не дае выніку. Выпадкаў, калі маленькія дзеці праглынаюць дробныя прадметы, у тым ліку батарэйкі, менш не становіцца», - кажа Вячаслаў Ігнаценка.

У большасці такіх выпадкаў вінаватыя, вядома ж, бацькі, якія абавязаныя кантраляваць прадметы, якія атачаюць дзіця. Але бывае, што дробныя прадметы ў рукі дзіцяці дарослыя даюць спецыяльна - для, як яны кажуць, развіцця маторыкі.

Праглынутая манета, вядома, не такая небяспечная, як напрыклад, праглынутая батарэйка, якая можа прывесці да моцнага электрахімічнага апёку стрававода або страўніка, але прыемнага ўсё адно мала.

«Калі манета прайшла праз стрававод і правалілася ў страўнік, то, хутчэй за ўсё, яна выйдзе натуральным шляхам, разам з фекаліямі. Але праглынутая манета можа і затрымацца ў кішэчніку, што прывядзе да ўтварэння пролежняў і далей да разбурэння кішкі», - адзначыў Вячаслаў Ігнаценка.

Кожны такі выпадак патрабуе лекарскага назірання, вызначаных маніпуляцый - напрыклад, абавязковае эндаскапічнае даследаванне. «А гэта ўсё стрэс, нервы, што здароўя дзіцяці не дадае», - падкрэсліў спецыяліст.

Медыкі вельмі раяць бацькам берагчы маленькіх дзяцей ад кантакту з усялякімі прадметамі, памер якіх дазваляе іх праглынуць, а цяпер - і з манетамі. Спазнаць кошт гэтых грошай малыя яшчэ паспеюць.