Мінабароны Балгарыі абвінаваціла РФ у правакацыях з паветра
8- 24.07.2016, 19:46
- 5,094
Апошнія месяцы вырасла колькасць парушэнняў паветранай прасторы краіны расейскімі вайсковымі і камерцыйнымі самалётамі.
Міністр абароны Балгарыі Мікалай Ненчаў заявіў у нядзелю, 24 ліпеня, што апошнія месяцы вырасла колькасць парушэнняў паветранай прасторы краіны расейскімі вайскоўцамі і камерцыйнымі самалётамі. Ён расцаніў гэта як правакацыі ў дачыненні да Балгарыі і яе вайскова-паветраных сілаў, паведамляе агенцтва Reuters (пераклад - Newsru.com).
Кіраўнік вайсковай установы ў эфіры тэлеканала Nova TV заявіў, што толькі за чэрвень было зафіксавана 10 такіх інцыдэнтаў: чатыры выпадкі пралёта расейскіх вайсковых самалётаў праз балгарскую зону адказнасці ў рамках абавязанняў у сяброўстве ў NATO і шэсць аналагічных ПП з пасажырскімі лайнерамі.
Cа слоў міністра, расейскія самалёты пры ўваходзе ў паветраную прастору Балгарыі, як правіла, выключаюць транспандэры - прылады, якія спрашчаюць вызначэнне месцазнаходжання самалёта. Ён паведаміў, што Балгарыя ўжо запатрабавала ад РФ тлумачэнняў з гэтай нагоды.
Нагадаем, Балгарыя раней неаднаразова закрывала сваю паветраную прастору для расейскіх самалётаў. Між іншым, у кастрычніку 2015 года ўлады краіны забаранілі пралёт над сваёй тэрыторыяй самалётаў МНС РФ, якія павінны былі даставіць гуманітарную дапамогу ў Сірыю.
Міністэрства абароны Расеі пакуль не пракаментавала гэтую заяву, адзначае РІА «Новости».
Раней у NATO заяўлялі пра актыўнасць расейскіх ВКС у еўрапейскай паветранай прасторы, між іншым, над Балтыйскім морам.