У Турцыі сілавікі заблакавалі вайсковую базу Інджырлік
5- 31.07.2016, 12:26
- 8,283
Прычынай гэтаму сталі паведамленні аб магчымай спробе перавароту ў Адан, што размешчаны за 8 км ад вайсковай базы.
Супрацоўнікі сілавых устаноў Турцыі атачылі вайскова-паветраную базу Інджырлік, якая выкарыстоўваецца NATO і турэцкімі ВВС.
Прычынай гэтаму сталі паведамленні аб магчымай спробе перавароту ў Адан, што размешчаны за 8 км ад вайсковай базы, паведамляе турэцкая газета Hurriyet (пераклад - РБК).
Доступ да вайсковага аб'екту быў абмежаваны а 23:00 паводле мясцовага часу. Зараз базу атачаюць блізу 7 тыс. супрацоўнікаў сілавых устаноў. Яны заблакавалі ўсе ўваходы і выхады.
Пры гэтым міністр Турцыі ў еўрапейскіх справах Амар Чэлік у сваім Twitter сцвярджае, што на авіябазе адбылася праверка сістэм бяспекі, а не спроба яшчэ аднаго перавароту.
«Я знаходжуся ў Адан... Мы правялі супольную праверку сістэм бяспекі. Ніякіх праблем не выявілі»,v- напісаў Чэлік.
Haber Turk звязвае блакаванне базы з візітам Кіраўніка камітэта начальнікаў штабоў УС ЗША Джозэфа Данфорда, які мае намер наведаць Турцыю ў нядзелю, 31 ліпеня. Ён плануе правесці двухбаковыя сустрэчы ў Анкары і наведаць амерыканскія войскі, якія дыслакуюцца на базе Інджырлік.
У ноч на 16 ліпеня ў Турцыі адбылася спроба вайсковага перавароту. Мяцежнікі захапілі некаторыя ўрадавыя будынкі ў Стамбуле і Анкары, аднак пазней улады краіны заявілі аб падаўленні путчу. Пасля гэтага ў краіне быў уведзены рэжым надзвычайнага становішча.