Беларусы бягуць на заробкі ў Расею і ЗША

У Беларусь жа на заробкі прыязджаюць у асноўным кітайцы.

Міністэрства ўнутраных спраў падлічыла, колькі ў нашай краіне працоўных мігрантаў і эмігрантаў. Так, за першыя паўгода ў Беларусь на заробкі прыехалі 11 087 чалавек. Гэта значна менш, чым за аналагічны перыяд мінулага года (16 545 чалавек). А вось з'язджаць на заробкі ў іншыя краіны мы сталі часцей. Так, у студзені - чэрвені 2016 года па доўгі рубель адправіліся 3825 беларусаў. Прынамсі, у першым паўгоддзі мінулага года з'язджалі 3333 чалавекі. Трэба адзначыць, што гэта афіцыйныя звесткі. Колькі рэальна беларусаў з'язджае ў тую ж Расею на заробкі - невядома. Таму што межаў, пашпартнага кантролю паміж дзвюма краінамі няма, піша «Комсомольская правда в Беларуси».

Часцей за ўсё выязджалі на работу за мяжу з Менска - 1666 чалавек. На другім месцы - Магілёўская вобласць (777 чалавек), а на трэцім - Віцебская (624).

Хто ж часцей за ўсё прыязджае ў Беларусь на заробкі? Сёлета ў лідарах кітайцы - 4076 чалавек. Летась іх было нашмат менш - 3885 чалавек. Упершыню работнікаў з Кітая ў нашу краіну прыязджае больш, чым з Украіны. Украінцаў за першыя паўгода 2016 года прыехала 3334 чалавекі, а летась было ўдвая больш - 7898 чалавек.

Часцей за ўсё замежнікі прыязджаюць да нас на заробкі ў Менск (5271 чалавек), у Гомельскую (1764) і Менскую вобласці (1253 чалавекі).

Хто з'язджае з Беларусі і хто прыязджае?

Калі паглядзець па спецыяльнасці, то ў Расею і Польшчу беларусы часцей за ўсё едуць рабочыя. У ЗША нашы суайчыннікі з'язджаюць для працы ў сферы абслугоўвання.

З Кітая на працу да нас прыехалі ў першае паўгоддзе 3088 рабочых, 888 кваліфікаваных спецыялістаў, 57 кіраўнікоў. З Украіны ў асноўным прыязджаюць для працы ў Беларусі людзі рабочых спецыяльнасцяў (1522 чалавекі) і кваліфікаваныя спецыялісты (922).