Міністр адукацыі: «Нашы настаўнікі - проста цудоўныя»

Міхаіл Жураўкоў працягвае не заўважаць праблемы адукацыі.

Сёлета ўпершыню за апошнія гады не было праблем з наборам на бюджэтныя месцы на педагагічныя спецыяльнасці ў ВНУ, распавёў у студыі «Галоўнага эфіру» на тэлеканале «Беларусь 1» міністр адукацыі Міхаіл Жураўкоў.

«Сёлета ў нас праблем з педагагічнымі кадрамі не назіраецца, конкурс на гэтыя спецыяльнасці вырас, на некаторыя факультэты і спецыяльнасці сярэдні бал - да 300 і вышэй. Спадзяюся, гэта расце прэстыж прафесіі», - цытуе чыноўніка tut.by.

Жураўкоў таксама падзякаваў настаўнікам за падрыхтоўку алімпіяднікаў, адзначыўшы, што сёлета Беларусь устанавіла своеасаблівы нацыянальны рэкорд, атрымаўшы ўжо 42 медалі міжнародных алімпіяд у розных вучэбных дысцыплінах. «Будзе яшчэ некалькі», - упэўнены міністр.

«Нашы дзеці вельмі таленавітыя, нашы настаўнікі - проста цудоўныя. Наша школьная сістэма адукацыі паказвае, што яна добрая і дазваляе рыхтаваць не проста спецыялістаў, а выбітных, таленавітых дзяцей, якія могуць выконваць вельмі незвычайныя заданні», - мяркуе Жураўкоў.

Ацэньваючы падрыхтоўку да новага навучальнага года, міністр адзначыў, што за колькасцю новых школ не гналіся - іх пакуль адкрыта ўсяго дзве, але шмат школ уведзена ў строй пасля капрамонту. «Акрамя таго, мы пачалі рэалізацыю з Міжнародным валютным фондам праекта ў капітальным рамонце і поўнага абсталявання маленькіх школ у невялікіх райцэнтрах, сельскіх школ. Гэта і WiFi, і спецыяльныя гаджэты для правядзення заняткаў», - распавёў ён. Сёлета такіх школ будзе падрыхтавана амаль сорак.

Міхаіл Жураўкоў таксама прынёс у студыю адзін з новых базавых падручнікаў - падручнік гісторыі Беларусі за 6 клас. «Ён нашмат меншы за ранейшы, вельмі маляўнічы, амаль на кожнай старонцы тут ёсць спасылкі на электронныя рэсурсы», - адзначыў міністр.

Напярэдадні, як паведамляў charter97.org, міністр заявіў, што настаўнікаў не моцна хвалюе павелічэнне заробку.