Пасажыры выклалі ў Сетку фота «Боінга», у якога ў палёце разарвала рухавік

Рэйс амерыканскай авіякампаніі Southwest Airlines накіроўваўся з Новага Арлеана ў Арланда, калі пасажыры заўважылі праблему з рухавіком.

На фотаздымках, размешчаных у сетцы, відаць адсутнасць франтальнай часткі рухавіка самалёта, паведамляе расейская служба BBC.

Прадстаўнік авіяперавозчыка заяўляе, што выбуху рухавіка не было. Нацыянальная рада бяспекі на транспарце вядзе расследаванне прычын паломкі рухавіка.

Стэфані Мілер знаходзілася на борце самалёта і ў інтэрв'ю сказала, што пасажыры пачулі моцны выбух на вышыні прыблізна 10 тысяч футаў (крыху больш за тры тысячы метраў). Пасля гэтага, з яе слоў, запахла гарэлым.

Стэфані размясціла ў «Твітэры» фатаграфію, як яна і яшчэ адзін пасажыр сядзяць у кіслародных масках.

Звесткі палёту паказваюць, што «Боінг-737» знізіўся з 30 да 10 тысяч футаў (прыкладна з дзевяці да трох тысяч метраў) усяго за восем хвілін.

Лайнер здзейсніў вымушаную пасадку ў горадзе Пенсакола, штат Фларыда.

Асацыяцыя пілотаў авіякампаніі Southwest Airlines размясціла ў «Твітэры» фатаграфію пашкоджанага рухавіка самалёта.

Ніхто з 99 пасажыраў і пяці сябраў экіпажа ў выніку авіяздарэння не пацярпеў.

Экспэрт у сферы авіяцыйнай бяспекі Майкл Бойд кажа, што для Southwest Airlines і іншых буйных авіякампаній такая аварыі - крайняя рэдкасць.

«Гэта адзінкавы, практычна нечуваны, выпадак. У кампаніі Southwest Airlines бездакорныя паказчыкі ў сферы бяспекі палётаў, бо яна шмат выдаткоўвае на тэхнічнае абслугоўванне сваіх самалётаў», - дадаў Бойд.