Прадаўцу, якога пакусала падатковая інспектарка, прыйшоў адказ з міліцыі

Нягледзячы на паказанні сведак, праваахоўныя органы не знайшлі складу злачынства ў тым, што здарылася.

У чэрвені СМІ распавядалі пра канфлікт паміж прадаўцом і падатковай інспектаркай, які ўспыхнуў на рынку ў Баранавічах. Гандляр Ігар Чубрык сцвярджаў, што падчас кантрольнай закупкі падатковая інспектарка, не паказаўшы дакументы, накінулася на яго, падрапала і ўкусіла за грудзі. З заявамі на спецыяліста мужчына звярнуўся ў міліцыю. Адказам Чубрык незадаволены: у распачынанні крымінальнай справы яму адмовілі, піша tut.by.

У дакуменце, які на пачатку жніўня прыйшоў Ігару з Баранавіцкага ГАУС, паведамляецца: «Паводле вынікаў праверкі вынесена пастанова аб адмове ў распачынанні крымінальнай справы...». Сваю пастанову ў міліцыі патлумачылі тым, што ў дзеяннях інспектара «адсутнічаюць прыкметы складу злачынства».

- Я з такім адказам не згодны і напісаў заяву ў пракуратуру. Бо знайшліся яшчэ сведкі, якія гатовыя пацвердзіць: правяраючым я не супраціўляўся, а значыць, інспектарка ўкусіла мяне не з самаабароны, - ледзь стрымлівае эмоцыі мужчына. - У выніку пракуратура скасавала пастанову для дадатковай праверкі, але асаблівых ілюзій я не маю.

У інспекцыі МПЗ горада Баранавічы таго, што паміж іх супрацоўніцай і прадаўцом быў канфлікт, не адмаўляюць. Але погляд на тое, што адбылося тут свой.

- Калі нашы супрацоўнікі падышлі да прадаўца, пачулі, як па тэлефоне яго хтосьці папярэдзіў аб праверцы, - у чэрвені распавядаў Вячаслаў Майкоўскі, начальнік аддзела кансультацый інспекцыі МПЗ горада Баранавічы. - Яны паказалі службовыя пасведчанні і загады, мужчына падаў прыходна-касавыя ордэры. Вывучаючы дакументы, інспектары заўважылі сшытак з запісамі аб даходах. Пачалі задаваць удакладняючыя пытанні аб парадку прыёму грошай і іх афармленні. Раптам мужчына стаў нервавацца, махаць рукамі і нагамі, лаяцца матам, выштурхоўваць супрацоўнікаў з бокса.

Дарэчы, інспектар тады таксама напісала на Чубрыка скаргу ў Баранавіцкі ГАУС. На днях сітуацыю разбіраў суд Баранавіцкага раёна і горада Баранавічы. У дачыненні да падатковай інспектаркі складзены пратакол аб адміністрацыйным правапарушэнні: «яна... падчас канфлікту наўмысна ўкусіла Чубрыка», а таксама «абразіла [Чубрыка] словамі, выяўленымі ў непрыстойнай форме, і нецэнзурнай лаянкай...». У дачыненні да прадаўца таксама складзены пратакол аб адміністрацыйным правапарушэнні: «ён адмовіўся выконваць неаднаразовыя законныя патрабаванні і распараджэнні дзяржінспектара... не падаў дакументы, выштурхваў інспектараў з павільёна рукамі, спрабаваў ударыць...», а таксама «выказваў у адрас дзяржінспектара словы абразлівага зместу...».

Аднак з прычыны заканчэння тэрміну даўнасці справы аб адміністрацыйных правапарушэннях суд пастанавіў спыніць.

- Але ведаеце, што крыўдна, - працягвае Ігар Чубрык. - На загад падатковай мне цяпер трэба заплаціць 10 базавых (210 рублёў) штрафу за непадпарадкаванне, а інспектарку не прыцягнулі нават да дысцыплінарнай адказнасці.