Намеснік міністра адукацыі вучыць педагогаў падманваць школьнікаў

Чыноўніца занялася адкрытым маніпуляваннем фактамі.

Міністэрства адукацыі разаслала ў навучальныя ўстановы метадычныя рэкамендацыі для правядзення тэматычнага ўрока «Нам мір завешчана берагчы!», які павінен прайсці ва ўсіх школах краіны 1 верасня, паведамляе «Беларускі партызан».

На дакуменце - подпіс намесніцы міністра адукацыі Раісы Сідарэнкі, якая ў міністэрстве курыруе пытанні дашкольнай, сярэдняй і сярэдняй спецыяльнай адукацыі.

Значная частка дакумента - гэта агульныя фразы пра тое, што мір лепш за вайну і беларусы шануюць чыстае неба над галавой, а таксама пра тое, што «першы ўрок павінен спрыяць выхаванню ў навучэнца пачуцця гонару за міралюбівую палітыку нашай дзяржавы, уключэнню вучняў у міратворчую дзейнасць, накіраваную на міласэрнасць».

Аднак, метады, якімі намеснік міністра прапануе выхоўваць у школьнікаў «пачуццё гонару» выклікаюць здзіўленне, бо з'яўляюцца адкрытым маніпуляваннем фактамі.

Прынамсі, настаўнікам рэкамендавана казаць пра беларускія «дасягненні»:

- «З 2014 года ўпершыню за 20 гадоў колькасць жыхароў Беларусі пачала расці. Узроўні нараджальнасці і смяротнасці практычна зраўняліся - сціснутыя так званыя дэмаграфічныя нажніцы. Гэта вынік, да якога мы так імкнуліся і якім мы ганарымся».

Насамрэч нараджальнасць у нашай краіне забяспечвае ўзнаўленне насельніцтва толькі на 65%, а рост колькасці насельніцтва забяспечваецца за кошт міграцыі, пры гэтым беларусаў, якія з'ехалі з краіны, наша статыстыка амаль не ўлічвае. У лік эмігрантаў запісваюць толькі тых, хто афіцыйна пакінуў краіну паводле звестак МУС.

Тым часам паводле звестак Дэпартамента эканамічных і сацыяльных пытанняў ААН, дзе маецца спецыяльны аддзел народанасельніцтва, сёлета ў Беларусі нарадзілася 73.595 дзяцей, а памерлі 89 056 чалавек. Толькі паводле стану на 13.00 29 жніўня ў Беларусі нарадзілася 168 дзяцей, а смерцяў было зарэгістравана - 203.

Дык ці ёсць чым выхваляцца?

«Мадэрнізацыя вытворчасці дазволіла абнавіць тэхналогіі і істотна скараціць выдаткі на выпуск вырабаў. Зніжэнне ўзроўню матэрыялаёмістасці прадукцыі ў прамысловасці склала блізу 8 адсоткаў».

Насамрэч правалы беларускай мадэрнізацыі - гэта асобная гісторыя.

Мадэрнізаваныя вытворчасці сышлі ў яшчэ большыя страты, чым было да таго, як імі занялася дзяржава. Прыклады таму - дрэваапрацоўчая прамысловасць, вытворчасць цэменту, амаль што загінула машынабудаванне.

«Мадэрнізаваная» сельская гаспадарка, куды ўкладзеныя мільярды даляраў дзяржаўных сродкаў, дагэтуль не можа без фінансавай дапамогі правесці ні пасяўную, ні ўборачную.

Але намесніца міністра адукацыі мяркуе, што дзецям пра гэта можна не казаць.

«Паказчыкам сусветнай цікавасці да беларускай эканомікі з'яўляецца ўзрослая актыўнасць замежных інвестараў. За апошнія пяць гадоў аб'ём замежных інвестыцый у эканоміку вырас у 2,5 разы, пры гэтым прыцягнутыя амаль 11 мільярдаў даляраў на чыстай аснове».

Калі школьнікі глядзяць тэлевізар, то словы настаўнікаў (калі яны, сапраўды, будуць кіравацца метадычнымі рэкамендацыямі намесніцы міністра) аб сумах інвестыцый іх вельмі здзівяць.

Паколькі нядаўна высокія дзяржаўныя чыноўнікі скардзіліся з тэлеэкранаў з нагоды значнага падзення замежных інвестыцый, распавядаючы пры гэтым, што вялікую частку таго, што ў нас называюць інвестыцыямі, складаюць крэдыты і пазыкі замежным банкам.

Якую выснову павінен будзе зрабіць уважлівы школьнік? Выснову пра тое, што настаўнікі яго падманваюць.

Атрымліваецца, што самім нам пахваліцца асабліва няма чым. Хоць тое, што нашы дзяды атрымалі ў 1945-м вялікую Перамогу - гэта так, гэта бясспрэчна. Толькі аб тым, чаму пераможцы жылі і жывуць горш, чым пераможаныя, настаўнікам са школьнікамі абмяркоўваць не рэкамендуецца.