У гаспадарках Віцебшчыны гінуць каровы: у іх рацыёне - цвікі, дрот і шпагат

Умовы ўтрымання жывёл на дзяржаўных фермах інакш як варварствам не назавеш.

Пракурорскія работнікі вобласці праверылі факты паморку буйной рагатай жывёлы на сельскагаспадарчых прадпрыемствах. Абследавалі, як тут выконваюць патрабаванні ветэрынарна-санітарнага заканадаўства. Пацікавіліся і тэмай рэалізацыі кароў камерцыйным структурам і насельніцтву. І выявілі шмат фактаў безгаспадарчасці, паведамляе greenbelarus.info.

Паморак жывёлы вырас

- На фермах паўсюдна парушаюць умовы ўтрымання жывёл. І ў выніку - мор і непрадукцыйнае забіванне жывёлы, - канстатуе Вольга Грыцкевіч, старшая пракурорка аддзела нагляду за выкананнем заканадаўства і законнасцю прававых актаў пракуратуры вобласці.

- Да прыкладу, у Докшыцкім раёне быдла гіне з прычыны наяўнасці ў кармах іншародных прадметаў. Так, у ААТ «Барсучанка» пры ўскрыцці мёртвай жывёліны выявілі фрагмент дроту. У ГП «АграСітцы» у тушы знайшлі цвік. На фермах ААТ «Таргуны» і ААТ «Барсучанка» ў корме апынуліся фрагменты поліэтыленавай плёнкі, шпагата, - распавядае Вольга Грыцкевіч.

Кіраўнікам гаспадарак вынеслі прадпісанні, а начальніку ўпраўлення сельскай гаспадаркі і харчавання райвыканкама - прадстаўленне. Паводле вынікаў яго разгляду трох супрацоўнікаў прыцягнулі да дысцыплінарнай адказнасці. Пракуратура раёна падрыхтавала 2 пазовы ў суд аб спагнанні шкоды з вінаватых.

Спісваюць на страты

Парушэнні кармлення і гадавання жывёлы дапускалі ў гаспадарках «Любінава», «Міёрскі», «Дрыгучы» Мёрскага раёна, «АСБ Агра-Наватар», «Дразды-Агра» Бешанковіцкага раёна, «Беленева» Сененскага раёна і г.д. Пры гэтым кіраўніцтва не аналізавала прычыны, чаму жывёлы хварэлі. Вінаватых у парушэнні ветэрынарна-санітарных нормаў да адказнасці не прыцягвалі.

Невыкананне патрабаванняў ветэрынарнага заканадаўства выклікала паморак 79 галоў жывёлы ў гаспадарках «Адаменка», «Барсеева», «Крынкі» Лёзненскага раёна. Сабекошт мёртвай жывёлы тут спісалі на страты гаспадаркі. Дзякуючы ўмяшанню пракуратуры кампенсавана больш за 2,5 тысячы рублёў. У судовым парадку спагнана больш за 62 рублі.

Не займаюцца біяабаронай

На аб'ектах жывёлагадоўлі не забяспечаная праца дэзбар'ераў. Адсутнічаюць санпрапускнік, агароджы, у памяшканнях не выконваецца мікраклімат. Такія факты выявілі ў Браслаўскім, Дубровенскім, Мёрскім, Сенненскім і іншых раёнах.

У многіх гаспадарках зафіксавалі парушэнні тэхналогіі нарыхтоўкі кармоў. Напрыклад, пад'язныя шляхі не высцілаюць саломай, не ўтрамбоўваюць, як след, травяную масу для жывёл. Між іншым, гэта датычыцца прадпрыемстваў «Васюкі» Шаркаўшчынскага раёна, «Выдрэя» «Віцебскага аддзялення БЧ», «Новая Дуброва-Агра» Лёзненскага раёна, «Туркава», «Юбілейны», «Міёрскі», «Папшулі», «Павяцце», «Мерыца» Мёрскага раёна і іншых.

«Прадаюць» насельніцтву

- Кіраўніцтва спрабуе схаваць паморак ад уліку пад выглядам продажу жывёлы насельніцтву і работнікам гаспадаркі. Такія факты былі ў КУСГП імя Чарняхоўскага Дубровенскага раёна, на прадпрыемстве «Кашчынскае» Чашніцкага раёна. Гаспадаркі не забяспечваюць належны ўлік руху жывёлы. Дапускаюцца шматлікія парушэнні пры вядзенні першасных уліковых дакументаў, а гэта можа спрыяць крадзяжу, - працягвае работнік пракуратуры.

На ферме «Прошкава» Глыбоцкага раёна ўсталявалі, што ў снежні 2015 года тут выключылі з дойнага статка 170 кароў. Кіраўнік і галоўны заатэхнік растлумачылі, што іх перавялі на адкорм з-за нізкай прадукцыйнасці. Але дакументаў, якія пацвярджаюць гэта, няма. Пракуратура раёна праводзіць праверку.

Прадаюць ніжэй за сабекошт

Нярэдка жывёлу - пад выглядам рэалізацыі насельніцтву і работнікам гаспадаркі - прадаюць людзям, якія займаюцца незаконнай прадпрымальніцкай дзейнасцю. Гэта дапускалі на прадпрыемствах «Роскі Сялец», «Радуньскае», «Аршанскі райаграсэрвіс» Аршанскага раёна, «Прыазёрны мір» Шумілінскага раёна, «Баброва» Лепельскага раёна.

Ёсць і факты рэалізацыі жывёлы ніжэй за сабекошт. Між іншым, пракуратура Чашніцкага раёна ўстанавіла, што ААТ «Ведранскае-Агра» «за бясцэнак» прадавала БРЖ юрыдычным асобам, прадпрымальнікам і грамадзянам, якія не належаць да перапрацоўчых прадпрыемстваў.

Так, работніку «Ведрэнскае-Агра» у кошт зарплаты прадалі карову па цане 25 тысяч рублёў (да дэнамінацыі) за кілаграм. А старонні чалавек купіў тут 16 галоў буйной рагатай жывёлы па цэнах 7486 рублёў і 9 000 рублёў за кілаграм. Пазней яшчэ аднаму пакупніку прадалі 3 галавы жывёлы па цане 6000 рублёў за кіло. Пракурор Чашніцкага раёна арганізаваў праверку.

Няма належнага кантролю

- Вынікі праверкі сведчаць пра тое, што службовыя асобы ўпраўленняў сельскай гаспадаркі і харчавання райвыканкамаў, камітэта сельскай гаспадарцы і харчавання аблвыканкама не кантралююць дзейнасць прадпрыемстваў у выбыцці жывёлы. Няма кантролю і за фармаваннем дакладных звестак аб фактычнай колькасці кароў дойнага статка ў вобласці, павышэннем эфектыўнасці вытворчасці прадукцыі жывёлагадоўлі, захаваннем патрабаванняў заканадаўства аб захаванасці жывёлы.

Вывучэнне сітуацыі ў выбыцці жывёлы ў Глыбоцкім, Лепельскім і Шумілінскім раёнах паказала, што райсельгасхарчы не аналізавалі прычыны і падставы продажу гаспадаркамі буйной рагатай жывёлы камерцыйным арганізацыям і насельніцтву. Не вывучалі таксама і фармаванне цэн на продаж жывёлы сельгаспрадпрыемствамі. Выбракоўванне асноўнага статка спецыялісты гаспадарак выраблялі бескантрольна, - падкрэсліла Вольга Грыцкевіч.

У пракуратуры вобласці канстатуюць, што гэтыя факты сведчаць не толькі аб парушэнні ветэрынарна-санітарных і заатэхнічных норм і правілаў, але і патрабаванняў дырэктывы №3 «Аб прыярытэтных кірунках умацавання эканамічнай бяспекі дзяржавы». Дакумент прадпісвае кіраўнікам арганізацый кантраляваць рацыянальнае выкарыстанне матэрыяльных рэсурсаў.

Паводле вынікаў праверак пракуроры ў раёнах унеслі 9 прадстаўленняў, вынеслі 2 прадпісанні, прынесены 15 пратэстаў, прад'явілі 20 пазоваў на суму 232 млрд 570 млн рублёў (недэнамінаваных) аб спагнанні шкоды, прычыненай крадзяжамі, нястачаю і паморам жывёлы.

Пракуратура вобласці ўнесла прадстаўленне старшыні камітэта сельскай гаспадарцы і харчавання аблвыканкама аб ліквідацыі парушэнняў заканадаўства ў цэласці жывёлы.