Па сацсетцы гуляе фальшывая спасылка на бясплатныя квіткі Ryanair
- 30.08.2016, 12:27
- 27,087
Ірландская авіякампанія Ryanair папярэдзіла карыстальнікаў аб небяспецы трапіцца на вуду махляроў.
Паведамленне пра гэта з'явілася на афіцыйнай старонцы Twitter кампаніі.
Фальшывая спасылка распаўсюджваецца ў Facebook і прапануе атрымаць два бясплатныя квіткі ў гонар 35-годдзя кампаніі. Малюнак аформлены як авіябілет з лагатыпам перавозчыка. Хутчэй за ўсё, спасылка вядзе на фішынгавы сайт, які крадзе плацежныя звесткі карыстальнікаў, паведамляе tut.by.
«Калі ласка, звярніце ўвагу на інтэрнэт-махляроў, якія прапануюць бясплатныя квіткі Ryanair. Гэтая акцыя не з'яўляецца афіцыйнай», - напісалі прадстаўнікі авіякампаніі.
Ашуканцы нярэдка маскіруюцца пад буйныя кампаніі, каб выкрасці ў карыстальнікаў важныя звесткі. Да прыкладу, ва ўцечцы інтымных фота амерыканскіх знакамітасцяў у 2014 годзе быў вінаваты менавіта фішынг: махляр вымушаў зорак адпраўляць інфармацыю аб сваіх старонках у адказ на электронныя лісты, замаскіраваныя пад паведамленні ад Apple і Google.