«Нават пакуль у галаву не прыходзіць, што можа быць лепшым»

Як беларуска наважылася падаць заяўку на Тыдзень моды ў Нью-Йорку.

New York Fashion Week пройдзе з 9 да 14 лютага. Сярод удзельнікаў - малады беларускі брэнд адзення Maymont. Ён быў створаны ў 2020 годзе у Баранавічах, а сёння прадстаўлены таксама і ў Менску. Maymont стаў першым фэшн-брэндам з Беларусі, які выйшаў на сусветную пляцоўку ў Нью-Ёрку.

Як расказала заснавальніца брэнда Кацярына Вашчылка выданню BAR24, заяўку на ўдзел у New York Fashion Week яны падалі ў верасні 2023 года. І праз некалькі дзён з ёй стэлефанаваліся. Пасля чаго пачаліся абмеркаванні.

А заявіць пра сябе на такім высокім узроўні Кацярыну прымусіла ўпэўненасць у тым, што яе брэнд "самы лепшы ў свеце".

- Таму мне лёгка ісці з ім наперад. Як быццам ён мяне цягне за сабой і дапамагае расці, а не я яго, - адзначае яна. - Вядома ж, я не верыла, што такое з намі адбылося, мы ж зусім яшчэ маладыя і малавядомыя. Я і зараз дагэтуль да канца не веру. Мы ж першы беларускі брэнд, які ўдзельнічае ў паказе ў Нью-Ёрку.

«Зусім не падобная да нашых будняў»

Для паказу на Тыдні моды была спецыяльна падрыхтавана дызайнерская калекцыя. Яна складаецца з пяці вобразаў. Усе яны прывезеныя з вытворчасці ў Баранавічах і зараз рыхтуюцца да паказу.

Як тлумачыць Кацярына, калекцыя не супярэчыць ДНК брэнда, але «ў той жа час зусім не падобная на нашы будні». Яна таксама зазначае, што некаторыя элементы з яе можна будзе ўбачыць у новай калекцыі адзення, якая з'явіцца ў фірменных крамах Maymont у Беларусі.

Заснавальніца брэнда прызнаецца, што не чакала, што іх удзел у New York Fashion Week выкліча такі рэзананс.

- Навіна аб нашым удзеле разляцелася вельмі хутка, пра нас напісалі замежныя СМІ. Гэта вельмі прыемна. Пачуццё, быццам мы - удзельнікі Алімпійскіх гульняў. Да нас шмат увагі, - кажа Кацярына. - Для нас гэта першае мерапрыемства такога ўзроўню. Нават пакуль у галаву не прыходзіць, што можа быць лепшым.

Паводле ейныхслоў, усё гэта вельмі хвалюе і нават страшыць. Цяпер, перад паказам, шмат працы: трэба падрыхтаваць адзенне, аксэсуары, падабраць фрызуры, макіяж, адрэпетаваць.

- Чаканняў пакуль ніякіх няма, проста атрымліваем асалоду і сочым. Хаця цуды ўжо адбываюцца з намі. І пра іх мы яшчэ раскажам, – рэзюмуе Кацярына.

Тыдзень моды ў Нью-Ёрку (New York Fashion Week) - адзін з чатырох найбуйнейшых тыдняў моды ў свеце, нараўне з тыднямі моды ў Парыжы, Лондане і Мілане. Першы Тыдзень моды ў Нью-Ёрку быў праведзены ў 1943 годзе.