«Другі самалёт Ту-22М3 развярнуўся і ўцёк»
9- 19.04.2024, 12:37
- 19,934
З'явіліся новыя дэталі унікальнага палявання на стратэгічны бамбавік РФ.
Украіна магла збіць 2 варожыя самалёты стратэгічнай авіяцыі, але той, што ляцеў другім, уцёк пасля “непрыемнасці” з першым.
Пра гэта ў эфіры Радыё Свабода распавёў прадстаўнік Галоўнай управы выведкі Мінабароны Украіны Андрэй Юсаў.
Паводле ягоных слоў, адлегласць збівання была амаль 300 кіламетраў ад мяжы Украіны і "гэта сапраўды знакавая аперацыя".
“Відавочна, што калі Пуцін будзе каментаваць, што адбылося з ягоным стратэгічным бамбавіком, то ён скажа “ён упаў”. Мы можам канстатаваць - так, мы паспяхова правялі аперацыю ГУВ ва ўзаемадзеянні з Паветранымі сіламі, і гэта - дзейсная аперацыя. Упершыню падчас выканання баявой задачы ў паветры падчас поўнамаштабнага ўварвання знішчаны самалёт стратэгічнай авіяцыі. Іншы самалёт, які ішоў за ім, вымушаны быў развярнуцца, і гэта азначае, што яшчэ шэраг ракет не было выпушчана па Украіне”, - сказаў Юсаў.
Ён дадаў, што знішчэнне самалёта-бамбавіка - своеасаблівы паўтор аперацыі па знішчэнні А50 з праведзенай працай над памылкамі.
“На гэты раз гаворка ідзе пра адлегласць больш за 300 км ад украінскай мяжы. Гэта - сапраўды знакавая аперацыя”, - сказаў Юсаў.
Знішчэнне самалёта Ту-22М3: што вядома
19 красавіка ў Расеі ў Стаўрапольскім краі на зямлю падчас палёту упаў самалёт ВПС Расеі Ту-22М3. У Мінабароны РФ паведамілі, што самалёт упаў з-за тэхнічнай няспраўнасці.
У ГУВ паведамілі, што Украіна ўпершыню знішчыла расейскі стратэгічны бамбавік Ту-22М3 у паветры. Для гэтага выкарыстоўвалі ЗРК С-200.
У выніку падзення бамбавіка Ту-22М3 з ЗРК С-200 загінуў адзін з пілотаў. Двух іншых даставілі ў лякарню. Яшчэ аднаго шукаюць.