11-класнікі, якія хочуць паступаць за мяжу, не могуць атрымаць у Мінадукацыі патрэбную даведку

Што адбываецца?

Некаторыя 11-класнікі, якія сёлета збіраюцца паступаць за мяжу, сутыкнуліся з праблемай. У дадатак да апастылю атэстата ВНУ просяць у іх даведку, што школа, якую абітурыент заканчвае, можа выдаваць дакументы дзяржузору. Аднак Дэпартамент якасці адукацыі ў атрыманні такога дакумента нечакана пачаў адмаўляць. «Зеркало» даведалася, што адбываецца.

Андрэй - тата 11-класніка, які сёлета збіраецца паступаць у адзін з польскіх універсітэтаў. Мужчына расказвае, што звычайна даведку, пра якую ідзе гаворка, выпускнікі бралі ў Дэпартаменце кантролю якасці адукацыі Мінадукацыі.

- У дакуменце змяшчаецца інфармацыя, што школа, якую скончыла дзіця, мае акрэдытацыю ў Беларусі і можа выдаваць дакументы дзяржузору, - тлумачыць суразмоўца. - Акрамя таго, у ёй паказваюць, што атэстат, які падаў абітурыент, пацвярджае: яго ўладальнік сапраўды атрымаў агульную сярэднюю адукацыю і можа працягнуць вучобу ва ўстановах прафесійна-тэхнічнай, сярэдняй спецыяльнай і вышэйшай адукацыі на тэрыторыі Беларусі.

Яшчэ ў даведцы ёсць звесткі «аб адпаведнасці адзнак». Напрыклад, тое, што адзнакі 9-10 балаў адпавядаюць пяцёрцы («выдатна»), а, дапусцім, 6-8 - чацвёрцы («добра»).

Андрэй дакладна не ведае, ці патрэбны такія даведкі ва ўсе замежныя ВНУ. Але польскі ўніверсітэт, куды збіраецца яго сын, такі дакумент просіць. Дзіця мужчыны гэтай вясной змагло атрымаць патрэбную даведку. А вось іх знаёмым, якія звярнуліся ў Дэпартамент кантролю якасці адукацыі на днях, у ёй адмовілі. Патлумачылі гэта тым, што нібыта яе выдача не прадугледжаная законам і раней яе таксама нельга было выпісваць.

Са слоў суразмоўцы, у чатах, дзе маюць стасункі дзеці, якія сёлета збіраюцца паступаць за мяжу, і іх бацькі, пішуць, што і іншыя абітурыенты, якія звярнуліся нядаўна ў дэпартамент, таксама сутыкнуліся з такой праблемай.

- Знаёмым сказалі, калі гэтую даведку ўключаць ва Указ №200, то яе выдадуць, - распавядае суразмоўца і тлумачыць: - У раздзеле 6 гэтага дакумента апісаныя адміністрацыйныя працэдуры, якія тычацца адукацыі (напрыклад, дублікаты якіх дакументаў можна атрымаць. - Заўв. рэд. ). Тут сапраўды няма звестак аб гэтай даведцы.

Што гавораць чыноўнікі?

У Дэпартаменце кантролю якасці адукацыі, куды журналістка «Зеркала» патэлефанавала як маці 11-класніка, які збіраецца паступаць у Польшчу, сітуацыю з даведкамі пацвердзілі. У прыёмнай не адмаўлялі, што летась выпускнікі такі дакумент атрымлівалі.

- [Але] на сёння мы такую інфармацыю ўжо не выдаём, - паведамілі на тым канцы проваду і растлумачылі чаму: - Гэта не належыць да пераліку адміністрацыйных працэдур (не ўваходзіць у пералік [дакументаў], зацверджаных Указам прэзідэнта ад 2010 года №200). Таму мы, як дзяржорган, выдаваць такую інфармацыю не можам. У гэты пералік уваходзіць толькі апастыль. Калі вам трэба зрабіць апастыль дакумента, тады, калі ласка, падыходзьце на Казлова, 28 (адрас дэпартамента. - Заўвага. рэд.).

Таксама мы спыталі ў дэпартаменце, як быць, калі ад гэтага дакумента залежыць паступленне. У ведамстве прапанавалі напісаць у Міністэрства адукацыі электронны зварот. Адказ паабяцалі цягам 15 дзён.

- Гэта будзе як перапіска: вы напісалі, вам адказалі. Ці будзе гэта з'яўляцца дакументам для той жа Польшчы, я не ведаю, - сказалі ў дэпартаменце.

Акрамя таго, там нагадалі, што некаторыя школы размяшчаюць сертыфікаты з пацвярджэннем акрэдытацыі на сваіх сайтах. Магчыма, выказала меркаванне чыноўніца, замежнаму ўніверсітэту будзе дастаткова гэтага фота.

- У нас усе школы акрэдытаваныя, таму яны выдаюць дакумент аб адукацыі, - нагадалі там.

Андрэй распавядае, што людзі, якія трапілі ў такую бюракратычную пастку, у лістах плануюць указваць наступнае: «я вось такі, скончыў школу тады, мой атэстат нумар такі, прашу пацвердзіць, што школа (указаць яе назву) мае права выдаваць атэстаты і гэты дакумент дазваляе мне далей атрымліваць адукацыю ў ВНУ».