Мінпрацы вырашае, як спаганяць падатак з «дармаедаў»

У Беларусі разглядаюцца розныя варыянты рэалізацыі падатку з непрацуючых грамадзян.

«У Беларусі шырока абмяркоўваецца пытанне аб механізме кампенсацыі непрацуючым эканамічна актыўным насельніцтвам часткі дзяржаўных выдаткаў на аказанне ім і іх сем'ям сацыяльных і іншых паслуг, якія датуюцца дзяржавай. Пры гэтым разглядаюцца розныя варыянты рэалізацыі», - паведаміла міністр працы і сацыяльнай абароны Мар'яна Шчоткіна падчас анлайн-канферэнцыі, перадае БелТА.

«Пытанне гэта складанае, таму патрабуе дакладнай прапрацоўкі, - адзначыла Мар'яна Шчоткіна. - У маштабах рэспублікі павінен быць выпрацаваны празрысты механізм выяўлення асоб, якія павінны кампенсаваць дзяржаўныя выдаткі на сацыяльную сферу».

Нагадаем, ідэя ўвядзення «падатку на дармаедаў» не новая. Перыядычна пра яго ўвядзенне казалі вышэйшыя службовыя асобы дзяржавы. У прыватнасці, пра неабходнасць увядзення падатку, які будуць плаціць афіцыйна непрацуючыя грамадзяне ў ліпені заявіў прэм'ер-міністр Міхаіл Мясніковіч на нарадзе з кіруючым актывам Магілёўскай вобласці.

«У Беларусі каля 445 тыс. чалавек працаздольнага насельніцтва нідзе не працуюць. Гэтыя людзі не ўносяць ніякага ўкладу ў развіццё эканомікі і пры гэтым карыстаюцца сацыяльнымі выгодамі. Сітуацыю трэба выпраўляць. Адзін са спосабаў - увядзенне падатку з непрацуючых», - сказаў тады прэм'ер-міністр.

Раней пра тое, што «палата прадстаўнікоў» можа вярнуцца да абмеркавання праблемы «дармаедства», паведаміў яе член Аляксандр Ярашэвіч.

«Калі людзі не працуюць, хоць могуць, а жывуць за кошт астатняга грамадства, то трэба нешта з гэтым рабіць. І такія прыклады дармаедства ёсць паўсюдна», - сказаў «дэпутат».

У снежні мінулага года прыняць меры ў дачыненні да грамадзян краіны, прапанаваў Анатоль Тозік.

«У нас каля 400 тыс. чалавек тых, хто не працуе ці фактычна працуе, сыходзячы ад падаткаў і тым самым таксама паразітуючы на сацыяльнай палітыцы дзяржавы», - заявіў віцэ-прэм'ер.

Важна адзначыць, што многія беларусы не маюць афіцыйнага месца працы альбо выязджаюць на сезонныя працы за мяжу. У першую чаргу гэта датычыцца рабочых будаўнічых спецыяльнасцяў.