Польшча адкрые мяжу для тых, хто едзе на «Дзяды»

Усе, хто едзе 1 лістапада ў Беларусь і Украіну на магілы блізкіх, могуць вярнуцца ў Польшчу па «зялёным» калідоры.

Пра гэта сайту charter97.org паведамілі ў Мытным камітэце Рэспублікі Польшча.

Так званыя зялёныя калідоры дзейнічаюць на памежных пераходах у Цярэспалі, Славацічах, Дарахуску, Храбенным і Медыцы. Гэта адмыслова пазначаныя палосы, прызначаныя для тых, хто не перавозіць тавараў, якія падлягаюць мытнаму дэклараванню, а іх падарожжа мае выключна турыстычны або дзелавы характар. «Зялёныя» калідоры вылучаныя для таго, каб дазволіць такім людзям хутчэй перасякаць мяжу.

Адначасова Памежны камітэт нагадвае, што ў выпадку спробаў перасячэння мяжы па «зялёным» калідоры асобамі, якія перавозяць кантрабандныя тавары, да іх будзе ўжытае максімальна дапушчальнае законам пакаранне.