Мінфін: Падатак на аўто складзе ад 1 да 25 базавых велічынь

Планаваная да ўвядзення ў 2014 годзе дзяржпошліна на допуск транспарту да ўдзелу ў дарожным руху будзе мець дыферэнцыраваную стаўку.

Яна складзе ад 1 да 25 базавых велічынь (1 б.в. = Br130 тыс.), паведамілі агенцтву «Інтэрфакс-Захад» у прэс-службе міністэрства фінансаў Беларусі.

«Яе памер складзе ад 1 да 25 базавых велічынь у залежнасці ад прыналежнасці транспартнага сродку (юрыдычнай або фізічнай асобе), яго віду (грузавы або легкавы), дазволенай максімальнай масы», - адзначылі там.

У прэс-службе ўдакладнілі, што, як мяркуецца, за допуск да руху найбольш папулярных сярод беларускіх грамадзян легкавых аўтамабіляў прыйдзецца заплаціць пошліну ў памеры ад 3 (аўтамабіль з дапушчальнай масай не больш за 1 тону) да 5 базавых велічынь (1-2 тоны).

У прэс-службе звярнулі ўвагу на тое, што норма аб увядзенні дзяржпошліны прадугледжаная «нашым праектам закона аб унясенні змяненняў у Падатковы кодэкс на наступны год». Там падкрэслілі, што абмеркаванне дакумента яшчэ не завершанае і ён можа зведаць змены, у тым ліку на этапе разгляду ў парламенце.

Нагадаем, сфармаваныя ўрадам прапановы па падатковай палітыцы на 2014 год прадугледжваюць магчымасць увядзення ў Беларусі дзяржпошліны за допуск аўтамабіля да ўдзелу ў дарожным руху.

«Прапануецца ўвесці дзяржпошліну за выдачу дазволу на ўдзел аўтамабіля ў дарожным руху. Гэта разавы плацёж, ён будзе залежаць ад вагі аўтамабіля і выплачвацца па-за залежнасці ад таго, ідзе гаворка аб легкавых або грузавых аўтамабілях», - заявіў намеснік начальніка галоўнага ўпраўлення бюджэтнай палітыкі Міністэрства фінансаў Беларусі Алег Селіверстаў. Перыядычнасць выплаты дзяржпошліны на дадзены момант невядомая.