КХЛ аштрафавала «Авангард» за словы Касціцына
3- 15.11.2013, 15:26
- 14,211
КХЛ аштрафавала «Авангард» на 50 тысяч расейскіх рублёў за выказванні форварда Сяргея Касціцына пасля матчу з ЦСКА (1:3).
Пра гэта паведамляе афіцыйны сайт лігі.
Ліга адзначыла, што ў адпаведнасці з рэгламентам клуб абавязаны не дапускаць публічных негатыўных выказванняў наконт судзейства з боку гульцоў і трэнераў на працягу 24 гадзін пасля заканчэння матчу, піша goals.by.
У выпадку з'яўлення такіх выказванняў клуб на працягу сутак пасля матчу абавязаны прадставіць у КХЛ афіцыйную прэтэнзію да судзейства. Ва ўстаноўленыя тэрміны ніякіх афіцыйных зваротаў адносна судзейства матчу ЦСКА - «Авангард» ад омскага клуба не паступіла.
Нагадаем, пасля матчу форвард «Авангарда» Сяргей Касціцын заявіў, што яго партнёра па камандзе Сяргея Шырокава несправядліва выдалілі да канца матчу з ЦСКА (1:3).
«Пра суддзяў наогул няма чаго казаць - гэта проста цырк на полі. Што цяпер, што ў матчы з «Ак Барсам». Смешна нават на гэта глядзець. Якія «5+20», калі там і двух хвілін не было? Калі Сапрыкін сам разварочваецца, то - за што выдаляць? Цыркачы гэтыя суддзі, што тут яшчэ скажаш.
Як цыркачоў гэтых зменіш? Ніяк. Мы прыехалі, і яны пачынаюць нейкую лухту - нам даюць выдаленні, супернікам не даюць. Я не ведаю, што рабіць у такой сітуацыі.
Гаворка не ідзе пра нейкую прадузятасць. Проста яны судзіць не ўмеюць, вось і ўсё.
Я думаю, што ў нас не столькі праблема ў рэалізацыі галявых момантаў, колькі дысцыпліна падводзіць - ЦСКА ў большасці пераможную шайбу закінуў. Хоць, вядома, нам самім трэба больш забiваць - момантаў у кожнай гульні ствараем дастаткова», - адзначыў тады Касціцын.
Фота: Getty Images